Túrkistan oblysynda 4,5 myńǵa jýyq páter paıdalanýǵa beriledi
TÚRKІSTAN. QazAqparat - Túrkistan oblysynda turǵyn úı qurylysyna aǵymdaǵy jyly respýblıkalyq bıýdjetten 3,5 mlrd. teńge bólinbek.
Sondaı-aq oblystyq bıýdjetten osy maqsatqa 7,3 mlrd. teńge qarastyrylyp otyr. Nátıjesinde 63 kópqabatty arendalyq turǵyn úıdiń (3353 páter, 229,1 myń sh.m.) qurylysy júrgiziledi degen jospar bar. Bul týraly Túrkistan oblysy ákimdiginiń baspasóz qyzmeti habarlady.
Baspasóz málimetterine qaraǵanda, oblys ortalyǵy Túrkistan qalasynda - 20 úı, Kentaý qalasynda - 15 úı, Saryaǵash aýdanynda - 13 úı, Túlkibas aýdanynda - 7 úı, Arys qalasynda - 3 úı, Jetisaı aýdanynda - 2 úı, Shardara aýdanynda - 2 úı, Otyrar aýdanynda - 1 úı paıdalanýǵa berilmek.
Aıta keterligi, respýblıkalyq jáne oblystyq bıýdjet esebinen jyl qorytyndysy boıynsha 47 úı paıdalanýǵa beriledi dep josparlanýda.
Budan ózge, «Nurly jer» baǵdarlamasy boıynsha ótken jyldyń basynda 13 aýdan, qala ákimdikterine 31 ekiqabatty turǵyn úıge oblystyq bıýdjetten qarjy qarastyrylǵan. Búgingi tańda 12 (124 páter) turǵyn úıdiń qurylysy aıaqtaldy. Qalǵan aýdan, qala ákimdikterindegi 19 úı (190 páter) 2019 jyldyń 1-jarty jyldyǵynda paıdalanýǵa tapsyrylady.
Sondaı-aq, ótken jyly Túrkistan qalasynda «ÁKK Túrkistan» AQ-y jáne jeke salýshy arqyly 6 kópqabatty turǵyn úıdiń (336 páter, 26,1 myń sh.m.) qurylysy bastalǵan bolatyn. 2019 jyldyń 3-toqsanynda atalǵan nysandar tolyq paıdalanýǵa tapsyrylyp, barlyq páterler «7-20-25» baǵdarlamasy arqyly halyqqa usynylady.
Sonymen qatar, Túrkistan qalasy, Otyrar móltekaýdanynda «Túrkistan - jańa qala» turǵyn úı keshenderindegi aýmaǵy 38 gektar jer teliminde 88 kópqabatty turǵyn úı boı kóteredi. Aǵymdaǵy jyly 44 turǵyn úı paıdalanýǵa tapsyrylyp, barlyq páterler «7-20-25» baǵdarlamasy arqyly beriletin bolady.
Jalpy alǵanda Túrkistan oblysy boıynsha 2019 jyly 4377 páter el ıgiligine tapsyrylatyn bolady.
