Túrkistan oblysynda 335 myń tonna maqta jınaldy
TÚRKІSTAN. QazAqparat - Túrkistan oblysynda maqta jınaý naýqany aıaqtaldy. Oblystyq aýyl sharýashylyǵy basqarmasy bıyl sharýalardyń 335,9 myń tonna maqta jınalǵanyn málimdedi, dep habarlaıdy QazAqparat tilshisi.
Basqarmanyń habarlaýynsha, aǵymdaǵy jyly oblys boıynsha 132,5 myń ga maqta daqyly egilip, túsimdiligi ár gektarynan 25,3 tsentnerden shıtti maqta jınalǵan. Oblys boıynsha Otyrar (27,0 ts/ga), Shardara (26,4 ts/ga) jáne Jetisaı (25,9 ts/ga) aýdandary «aq altyn» jınaýda joǵary kórsetkishke qol jetkizgen. Jalpy jınalǵan maqtanyń 197,3 myń tonnasy kombaınmen terilgen.Osylaısha sharýalar ótken jylǵymen salystyrǵanda 4 myń tonna maqta artyq jınady.
Aıta keteıik, bıylǵy jyly maqta zaýyttary men qabyldaý beketterinde shıtti maqtanyń baǵasy 180 myń teńgeden belgilenip, taýar óndirýshilerge birshama qoldaý boldy. Al, kóktemgi jáne kúzgi dala jumystaryn júrgizýge 78,2 myń tonna janar-jaǵar maı bólinip, ishki naryqtaǵy baǵadan 20 teńge arzan taratyldy. Sonymen qatar, 86 myń tonnadan astam mıneraldy tyńaıtqyshtarǵa oblystyq bıýdjetten 4,3 mlrd.teńge qarjy bólindi. Sonyń nátıjesinde taýar óndirýshilerdiń aýyl sharýashylyǵy daqyldaryna paıdalanǵan mıneraldy tyńaıtqyshtardyń quny ishinara sýbsıdııalandy.
