Túrkistan oblysynda 300-den astam muǵalimniń dıplomy talapqa saı emes

TÚRKІSTAN. QazAqparat - Túrkistan oblysynda 300 -den astam muǵalimniń dıplomy talapqa saı emes. Bul týraly oblystyq qoǵamdyq keńes otyrysynda Sybaılas jemqorlyqqa qarsy is-qımyl agenttiginiń Túrkistan oblysy boıynsha departamenti preventsııa basqarmasy basshysynyń orynbasary Sábıt Ásilbek aıtty, dep habarlaıdy QazAqparat tilshisi.

«Ustazdardyń joǵary bilim týraly dıplomdarynyń durystyǵyn anyqtaý maqsatynda sybaılas jemqorlyq táýekelderine syrtqy taldaý júrgizildi. Onda jumys toby Qazaqstan Respýblıkasynyń joǵary oqý oryndaryna Túrkistan, Kentaý qalalary men Saýran aýdanyndaǵy 97 bilim berý mekemesiniń 3477 pedagoginiń tizimin joldady», - dedi Sábıt Ásilbek.

Nátıjesinde búgingi kúni 128 muǵalimniń dıplomdarynyń shynaıylyǵy rastalmaǵan. Sondaı-aq suraý salynǵan 30-dan astam joǵary oqý ornynyń tek 15-i ǵana jaýap bergen. Qalǵandarynan jaýap kútilip otyr.

Budan bólek, shet el dıplomdary bar 432 muǵalimniń de dıplomdaryna tekserý júrgizilgen. Onda da birshama zań buzýshylyqtar anyqtalǵan.

«Bilim týraly qujattardy taný (nostrıfıkatsııa) maqsatynda bilim berý mekemeleri qyzmetkerleriniń joǵary bilimi týraly sheteldik dıplomdarǵa Qazaqstan Respýblıkasy Bilim mınıstrliginiń Bilim salasyndaǵy sapany baqylaý komıtetine hat joldandy. Komıtettiń jaýap hatyna sáıkes 432 muǵalimniń 196-nyń Bilim týraly qujattary rastalmaǵany anyqtaldy. Bul fakt zań talaptaryn buzýmen qatar jalǵan dıplom retinde qabyldanady», - deıdi Sábıt Ásilbek.