Túrkistan oblysynda 3 jasar búldirshin órtengen kóliktiń ishinde qalyp qoıǵan
TÚRKІSTAN OBLYSY. QazAqparat - Túrkistan oblysynda 4 úı órtenip ketti. Taǵy jalynǵa oranǵan kóliktiń ishinen 3 jasar búldirshinniń máıiti tabylǵan, dep habarlaıdy QazAqparat tilshisi.
Oblystyq TJD baspasóz qyzmetiniń haralaýynsha, qaıǵyly jaǵdaı Saryaǵash aýdanynyń Jemisti aýylynda bolǵan.
«6-shy shilde kúni kúndizgi saǵat 13.23-te kezekshi bólimge Jemisti aýylynda 4 úı órtenip jatqany týraly habarlama kelip túsken. Oqıǵa ornyna 15 sóndirýshi men 3 tehnıka jumyldyrylǵan. Sondaı-aq aýdandyq ІІB-niń jedel-tergeý tobynyń 20 qyzmetkeri 4 tehnıkamen jetken. Jalyn bir kósheniń boıyndaǵy 4 úıge taraǵany anyqtaldy. Bir úıdiń ishinde «Vaz-2106» markaly kólik órtenip, ony tótenshe jaǵdaılar qyzmetkerleri sóndirip alǵan. Kóliktiń ishinen 2015 jylǵy balanyń máıiti tabyldy», - delingen habarlamada.
Órt bolǵan jerde sóndirý jumystary áli de jalǵasýda. Sondaı-aq, kóz jumǵan balanyń kólikte qalaı qalyp qoıǵany anyqtalyp jatyr.
Sońǵy málimet boıynsha órt úsh úıdiń 436 sharshy metr aýmaǵyn sharpyǵan. Al, tórtinshi úıdiń 96 sharshy metr shatyry janyp ketken. Janǵan jerdiń jalpy kólemi 536 sharshy metr. Órt 16.03-te tolyqtaı sóndirildi. Oqıǵa ornyna TJD-nyń 17 qyzmetkeri men 3 tehnıkasy jáne Saryaǵash aýdandyq ІІB-nyń jedel-tergeý tobynyń qyzmetkerleri jumyldyryldy.
