Túrkistan oblysynda 3 myńǵa tarta jumys orny ashylady

TÚRKІSTAN. QazAqparat - Túrkistan oblysy ákimdigi men Turkestan Invest mekemesi birlesip jalpy quny 615 mln AQSh dollaryn quraıtyn 13 ınvestıtsııalyq jobany júzege asyrýdy qolǵa aldy. Bul týraly búgin Óńirlik kommýnıkatsııalar qyzmetinde ótken baspasóz jıynynda Kazakh Invest ulttyq kompanııasynyń óńirlik dı⁠rektory Dáýletqoja Mamyrov málimdedi, dep habarlaıdy QazAqparat tilshisi.

Dáýletqoja Mamyrovtyń aıtýynsha, jospardy is júzinde júzege asyrý arqyly  óńirde 3 myńǵa tarta  jańa jumys oryndary ashylatyn bolady. Al, jyl sońyna deıin quny 47,5 mln AQSh dollaryn quraıtyn 3 joba iske qosylady dep kútilýde. Nátıjesinde jańadan 500-ge jýyq adam jumyspen qamtylmaq. 

«Búgingi kúnge deıin túrli salalarda 50 bıznes jospar jasalǵan. Onyń ishinde 4 joba oblysqa tıesili. Olardyń qatarynda turmystyq qaldyqtardy qaıta óńdeıtin zaýyt, túıe sútinen ónimder óndiretin kásiporyn jáne alıýmınıı jáne plastmassa buıymdar shyǵaratyn óndiris orny bar. Odan bólek, qosymsha 10 shaqty sheteldik ınvestordy tartý boıynsha kelissóz júrgizilip jatyr. Aıta ketetin jáıt, kóptegen sheteldik kompanııalar óńirge kelip, jumys isteýge erekshe qyzyǵýshylyq tanytyp otyr», - dedi Dáýletqoja Mamyrov.

Saraptamalyq zertteýler nátıjesinde álemniń damyǵan 36 eli ınvestıtsııa quıýǵa áleýetti ekeni anyqtalǵan. Alaıda, iskerlik qarym-qatynas ornatý boıynsha AQSh, Reseı, Ulybrıtanııa, Germanııa, Frantsııa, Italııa, QHR, Japonııa, Ońtústik Koreıa, Túrkııa, BAÁ sııaqty elderge basymdyq berilgen. Qazirgi tańda atalǵan elderde qarjy kózderin tartý boıynsha Kazakh invest ókildikteri men elshilerdiń arnaıy ınvestıtsııa boıynsha keńesshileri jumys isteýde.