Túrkistan oblysynda 286 otbasy tamshylatyp sýarý tehnologııasynyń arqasynda mıllıoner atandy
NUR-SULTAN. QazAqparat – Túrkistan oblysynda 286 otbasy tamshylatyp sýarý tehnologııasynyń arqasynda 1 mıllıon teńgeden tabys tapty. Bul týraly búgin Úkimet otyrysynda Túrkistan oblysynyń ákimi Ómirzaq Shókeev aıtty, dep habarlaıdy QazAqparat tilshisi.
«Bıyl aýyl sharýashylyǵy daqyldarynyń egis kólemi 843,4 myń gektar. Biz egistikti ártaraptandyrýǵa kóńil bólip otyrmyz. Onyń ishinde bıyl kartop, kókónis, baqsha daqyldarynyń aýmaǵy 5 myńnan astam gektarǵa, maıly daqyldar 9 myńnan astam gektarǵa, mal azyǵy daqyldary 3 myń gektarǵa artty. 2021 jylǵy ónim úshin egilgen 177,6 myń gektar kúzdik bıdaıdyń jaǵdaıy jaqsy. Kóktemgi dala jumystaryn júrgizýdi qoldaýǵa 21 myń aýyl sharýashylyǵy tehnıkasy tolyq daıyn. Jazdyq egistik endi bastalyp, 12 paıyz oryndaldy. Agroqurylymdar jazdyq daqyldardyń tuqymymen tolyq qamtamasyz etilgen», - dedi ol.
Oblys basshysynyń aıtýynsha, kóktemgi dala jumystaryn júrgizý úshin 37 myń tonna janarmaı bólingen. Aqpan, naýryz aıynda qarastyrylǵan janarmaı quny tolyq tólenip, agroqurylymdarǵa lıtri 158-159 teńgeden berilip jatyr.
«Dala jumystaryn nesıelendirýde ásirese «Agrarlyq nesıe» korporatsııasy jaqsy jumys istep jatyr. 4,5 mlrd teńge qarjy bólindi. Onyń 3 mlrd teńgesine ótinim túsip, maquldandy. Munan bólek osy jyly ósimdik sharýashylyǵyn qoldaýǵa 7,4 mlrd teńge baǵyttalyp otyr. Oblystyń klımatqa baılanysty biz bir alqaptan jylyna 2-3 ret ónim alý jobasyn iske asyrýdamyz. Byltyr bul baǵytta 2 myńdaı joba júzege asyryldy. Odan 268 myń tonna ónim alyndy. Nátıjesinde aýyl sharýashylyǵynda qosymsha 18 mlrd teńgeniń ónimi shyǵaryldy. Osy jobanyń tıimdiligine oraı bıyl taǵy 6 myń gektar qosylady. Sondaı-aq jeke úı ireisindegi qosalqy sharýashylyqtarda tamshylatyp sýǵarý tehnologııasyn qolǵa alyp jatyrmyz. Nátıjesinde byltyr 286 úı irgesindegi jerdi óńdep, otbasylardyń árqaısysy 1 mln teńgeden tabys tapty. Oǵan «Eńbek» baǵdarlamasyn paıdalanyp jatyrmyz», - dedi Ómirzaq Shókeev.
