Túrkistan oblysynda 28 jas dáriger baspanaly boldy
TÚRKІSTAN. QazAqparat - Túrkistan oblysynda shalǵaı aýyldardaǵy medıtsınalyq mekemelerde maman jetispeýshiligi máselesin sheshý maqsatynda baspana berile bastady.
Aımaq basshysy Janseıit Túımebaevtyń qoldaýymen, sońǵy jarty jyldyń ishinde joǵary oqý ornyn bitirip kelgen 28 jas dáriger úıli boldy. Bul týraly oblystyq densaýlyq saqtaý basqarmasynyń basshysy Muqan Egizbaev málimdedi, dep habarlaıdy QazAqparat tilshisi.
Baspanaly bolǵandardyń qatarynda hırýrg, onkolog, terapevt, balalar dárigeri jáne akýsher-gınekolog mamandary bar. Olardyń deni medıtsınalyq mamandyqty Almaty, Astana sekildi iri qalalardan meńgergen. Eńbek jolyn aýyldan bastaǵandy jón kórgen jastarǵa jergilikti bılik tarapynan qoldaý kórsetilip, árbir mamanǵa 1 mıllıon teńge bir rettik qarjylaı kómek tólenip keledi. Máselen, 2018 jyly aýyldarǵa joldama alǵan 89 jas maman osyndaı áleýmettik tólemdermen qamtamasyz etilgen.
«Mundaı kólemde dárigerlerge qoldaý ózge óńirlerde kórsetilgen joq. Nátıjeli jumystyń jalǵasy retinde oblystyq máslıhattyń sessııasynda osy kómek kólemin 1,5 mln-ǵa kóterýdi usynbaqpyz. Depýtattar qoldaıdy dep senemiz. Bul oblystaǵy tapshy mamandardyń ornyn toltyrýǵa septigin tıgizedi», - dedi oblystyq densaýlyq saqtaý basqarmasynyń basshysy Muqan Egizbaev.
Jańadan baspanaly bolǵan Erlan Álibekov eńbek jolyn Shardara aýdandyq ortalyq aýrýhanasynda bastaǵan. Ol otbasylyq dáriger, al kelinshegi akýsher-gınekolog. Aýdan ortalyǵyndaǵy kópqabatty turǵyn úıden eki bólmeli páter alyp, qonys toıyn ótkizgen otbasynyń jaqynda tuńǵyshtary dúnıege kelgen.
«Páter ózimizge unady. Jańa, jyly jáne barlyq jaǵdaıy jasalǵan. Jastarǵa qoldaý kórsetip jatqan basshylarymyzǵa tek alǵys aıtamyz. Bul bastamany júzege asyryp jatqan el aǵalaryna rızamyz»,- deıdi jas maman.
Atalǵan Shardara aýdanynda búginde 8 dáriger baspanaly boldy. Aýyldy jerge jumysqa ornalasqan taǵy 22 dáriger Maqtaral, Otyrar, Arys, Shardara, Keles, Maqtaral, Túlkibas, Ordabasy aýdandarynda turǵyn úıge qol jetkizdi. Óńirde jas mamandardy baspanamen qamtamasyz etý máselesi bıylǵy jyly da jalǵasyn tappaq.
