Túrkistan oblysynda 270 avtobýsqa elektrondy bılet júıesi engiziledi
TÚRKІSTAN. QazAqparat - Túrkistan oblysynda kólik salasy boıynsha jol kartasy jasalyp, QR Investıtsııalar jáne damý mınıstrligi jáne «Zerde» AQ-men kelisilim ornatylǵan. Búgingi kúni kólik kompanııalary men ınvestorlar arasynda elektrondy bıletti engizý týraly memorandýmǵa qol qoıyldy. Búgin bul týraly Túrkistan oblystyq óńirlik kommýnıkatsııalar qyzmetinde ótken brıfıngte Aqparattandyrý, memlekettik qyzmetter kórsetý jáne arhıvter basqarmasynyń basshysy Bastar Esqaraev málim etti , dep habarlaıdy QazAqparat.
Basqarma basshysynyń sózinshe, pılottyq joba aldymen Túrkistan qalasyndaǵy № 1A baǵytyndaǵy qoǵamdyq kólikterge engiziledi. Sonymen qatar, bir ýaqytta GPS trekery arqyly elektrondy bılet júıesi ornatylatyn bolady.
«Atalǵan pılottyq joba aıaqtalǵan soń qalǵan barlyq qalaishilik baǵyttaǵy 21 avtobýsty qamtý josparlanýda. Al, elektrondy bılet júıesi engizilgen avtobýstardyń jalpy sany 270-ti quramaq. Sondaı-aq, Túrkistan qalasynda ınvestorlar esebinen 1 «aqyldy» aıaldama jáne 5 jarnama stelin ornatý jobalanýda», - dedi Bastar Esqaraev.
Budan ózge, aǵymdaǵy jyldyń shilde aıynan bastap oblys ortalyǵy Túrkistan qalasynda 20 beınebaqylaý kamerasyn ornatý kózdelýde. Kentaý qalasynda qoǵamdyq tártiptiń saqtalýyn qamtamasyz etýshi 10 beınekamera jáne 2 ıntellektýaldyq jol qıylysyn ornatý josparlanyp otyr.
