Túrkistan oblysynda 26 kóshege «Astana» ataýy berildi

TÚRKІSTAN. QazAqparat - Túrkistan oblysynda elordanyń 20 jyldyq merekesine arnalǵan «Asqaqataı ber, Astana!» atty saltanatty shara uıymdastyryldy. Jıynǵa oblys ákimi Janseıit Túımebaev, oblystyq maslıhat hatshysy Qaırat Balabıev, «Nur Otan» partııasynyń oblystyq fılıaly tóraǵasynyń birinshi orynbasary Nurmahan Joldas, aýmaqtyq basqarmalar men departament basshylary, zııaly qaýym ókilderi jáne Túrkistan qalasynyń qonaqtary men turǵyndary qatysty.

Túrkistan oblysy ákimdiginiń baspasóz qyzmetinen málim etkendeı, shara Astana qalasynyń 20 jyldyǵyna arnalǵan kórmemen bastaldy. Onda elordamyzdaǵy ásem de, sáýletti ǵımarattardyń nobaıy beınelengen túrli buıymdar jurt nazaryna usynyldy.

Saltanatty jıynda aımaq basshysy Astana qalasynyń el tarıhynda alar ornyn ekshep, aıtýly kúnge oraı óńirimizde ótkizilgen sharalardy atap ótti.

«Astana - Qazaqstan táýelsizdiginiń Uly tuǵyry. Elorda - Elbasy ıdeıasynyń iske asyrylýy jáne barlyq Qazaqstan halqy eńbeginiń nátıjesi. Astananyń qalyptasýy Táýelsizdik shejiresimen tyǵyz baılanysty jáne memleketimizdiń búgingi jetistikteriniń sımvoly bolyp tabylady. Eldiń kóńil qýanyshyna aınalǵan arý qalamyzdyń mereıtoıyna oraı óńirimizde «El júregi - Astana» atty 532 is-shara ótkizildi. Elorda qurmetine oraı oblystyń birqatar eldi mekenderinde 26 kóshege «Astana» ataýy berildi. «Elordaǵa syılyq» jobasy boıynsha Túrkistan oblysy tarapynan Astana qalasyna tartý retinde jalpy quny 766,2 mln teńgeni quraıtyn 5,2 shaqyrym velojol nysany salyndy. Sonymen qatar, aǵymdaǵy jyldyń sońyna deıin oblys kóleminde birqatar áleýmettik nysandar, turǵyn úıler, bilim berý nysandary, mádenıet úıleri, sport keshenderiniń ashylý saltanaty Astana qalasynyń 20 jyldyq mereıtoıymen oraılastyrylýda», - dedi Janseıit Túımebaev.

Saltanatty shara barysyna  UOS jáne eńbek ardagerleri, Parlament jáne oblystyq máslıhattyń depýtattary, zań qyzmetkerleri, bilim, mádenıet jáne sport salasynyń ókilderi jalpy sany 24 azamat oblystyń  «Qurmetti azamaty» ataǵyn aldy. Olardyń qatarynda  eńbek ardagerleri Asqar Qulybaev, Orazaly Omarov, Dildábek Toıjanov, Parlament Senatynyń depýtaty Álı Bektaev,  kásipqoı boksshy Beıbit Shúmenov,  «Qazaq kúresi» Búkilálemdik federatsııasynyń birinshi vıtse-prezıdenti  Serik Tókeev, «Bolashaq» úzdiksiz bilim berý ortalyǵynyń dırektory Sattar Qýashbaı bar.

Budan bólek,  óńirdiń damýyna súbeli úles qosqan 30-ǵa jýyq azamat «Astanaǵa 20 jyl» medalimen marapattaldy.

Saltanatty sharanyń sońy óńir ónerpazdary daıyndaǵan kontserttik baǵdarlamaǵa ulasty.