Túrkistan oblysynda 25 myńǵa jýyq jumys orny qurylady

TÚRKІSTAN. QazAqparat – Túrkistan oblysynyń basshysy Ómirzaq Shókeevtiń qatysýymen apparat májilisi ótip, onda oblystyq Jumyspen qamtýdy úılestirý jáne áleýmettik baǵdarlamalar basqarmasynyń basshysy Ásııa Temirbaeva «Jumyspen qamtýdyń Jol kartasy» sheńberinde iske asyrylatyn jobalar týraly baıandady, dep habarlaıdy QazAqparat.

Óńir ákimdiginen málim etkendeı, «Jumyspen qamtýdyń 2020 - 2021 jyldarǵa arnalǵan jol kartasyna» sáıkes óńirde jańa ǵımarattar boı kóterip, áleýmettik-mádenı nysandar men turǵyn úı-kommýnaldyq sharýashylyq ǵımarattarynda jóndeý jumystary júzege asyrylmaq.

«Injenerlik-kólik ınfraqurylymdaryn qaıta jóndeýden ótkizip, eldi mekenderdi abattandyrý kózdelgen. Osy maqsatta Túrkistan oblysynda 460 ınfraqurylymdyq jobalar bekitilip otyr. Onyń ishinde 48 nysan Túrkistan qalasyn damytý josparyna baǵyttalǵan. Aýqymdy jumystar barysynda óńirde 25 myńǵa jýyq ýaqytsha jumys orny ashylady. Іs ilgeri qadam basyp, jobalar júzege asqan soń eki myńnan astam turaqty jumys oryndaryn qurý kózdelgen. Azamattardyń ortasha jalaqysy 85 myń teńgeden tómen bolmaıdy», - delingen aqparatta.

Qazirgi tańda, memlekettik satyp alýdyń erekshe tártibine sáıkes aýdan, qalalarda ınfraqurylymdyq jobalardy iske asyratyn merdigerlerdi anyqtaý jumystaryn júrgizý bastaldy. Mamyr aıynyń birinshi onkúndigine deıin ınfraqurylymdyq jobalardyń bastalýyn, tıisti jumys oryndaryna jumyssyzdardyń tartylýyn qamtamasyz etý josparlanyp otyr. Eń bastysy jumysshylardyń qaýipsizdigin qadaǵalaý maqsatynda barlyq qaýipsizdik sharalary qamtylyp, zalalsyzdandyrý jumystary júrgizilip otyrady.