Túrkistan oblysynda 25 mln teńgeniń malyn urlaǵan qylmystyq topqa úkim shyqty

SARYAǴASh. QazAqparat - Saryaǵash aýdanynda mal urlyǵymen aınalysqan uıymdasqan top músheleri sottaldy, dep habarlaıdy QazAqparat tilshisi.

Aýdandyq polıtsııa bólimine birneshe turǵyn aryzdanyp, jaıylymda júrgen 24 bas jylqy men 15 sıyrdy belgisiz bireýler urlap ketkenin jetkizgen.

Jábirlenýshilerge kelgen shyǵynnyń kólemi 25 000 000 teńgeni quraǵan.

Jedel-tergeý toby aqparat alysymen oqıǵa ornyna attanyp, jedel sharalardy júrgizdi.

Nátıjesinde mal urlyǵyna qatysy bar kúdiktilerdiń jeke basy anyqtalyp, kúdikti retinde tanylǵan 5 jergilikti turǵyn polıtsııa bólimine jetkizildi.

Polıtseıler isti aıyptaý aktisimen birge sotqa joldady.

Nátıjesinde sot sheshimimen kúdikti dep tanylǵan 5 azamattyń ekeýi 7 jyl merzimge sottalsa, qalǵan 3 kúdiktiniń bas bostandyǵy 7 jylǵa shekteldi.