Túrkistan oblysynda 25 qalamgerdiń saıty qurylady
TÚRKІSTAN. QazAqparat - Túrkistan oblysynda «Rýhanı jańǵyrý» baǵdarlamasyn tıimdi júzege asyrý» taqyrybynda qoǵamdyq tyńdaý ótti. Oǵan zııaly qaýym ókilderi men ólketanýshylar, basqarma basshylary men qoǵam belsendileri, ustazdar men ǵalymdar jáne BAQ ókilderi qatysty, dep habarlaıdy QazAqparat.
Jıynda Túrkistan oblystyq ishki saıasat basqarmasynyń basshysy Beısenbaı Tájibaev sóz sóılep, «Rýhanı jańǵyrý» baǵdarlamasyn júzege asyrý baǵytyndaǵy jumystarǵa toqtaldy.
Onyń sózinshe, óńirde Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy jarııalanǵan bir jyldan astam ýaqyt aralyǵynda barlyq basym baǵyttary boıynsha naqty jumystar atqarylǵan. Oblys ákimi Janseıit Túımebaevtyń tikeleı tapsyrmasymen el rýhanııatyna serpin beretin jobalar qolǵa alynyp, aımaqta óńirlik komıssııa, sarapshylar keńesi men Jobalyq keńse qurylǵan, arnaıy is-sharalar jospary bekitilgen. Tarıhı jáne týrıstik oryndary jóninde aǵylshyn, qazaq jáne orys tilderinde arnaıy rolıkter ázirlenýde.
«Bıyl Túrkistan oblysynyń 25 qalamgeriniń jeke saıttary ázirlenip, óńirdegi 10 aqyn-jazýshynyń kitaptary shyǵarylady. Bul rýhanııat salasyna oń áser beredi degen senimdemiz. «Bolashaqqa baǵdar: rýhanı jańǵyrý» aıasynda 3 anımatsııalyq jáne 1 kınofılm túsirilip, respýblıkalyq deńgeıdegi 10 sarapshynyń zertteý maqalasy ázirlenedi. Atap aıtsaq, «Ordabasy - birliktiń týy», «Oqsyz oqıǵasy», «Túrkistan» mýltfılmderi men «Tólebı» fılmi túsirilip jatyr. Sonymen qatar, «Tańbaly tastar - babalar izimen» Túrkistan Qarataý jotasy boıynsha baspasóz týry ótkizilip, «Ólketaný» oblystyq saıty ashylady.
Taǵy bir aıta keterligi, «Tańǵajaıyp Túrkistan» atty áleýmettik jeli qoldanýshylarynyń baıqaýy uıymdastyrylady. «Rýhanı jańǵyrý» - birneshe jylǵa ǵana arnalǵan emes, úzdiksiz jumys isteýdi talap etetin baǵdarlama», - dedi basqarma basshysy.
Basqosýda «Rýhanı jańǵyrý» jobalyq keńsesiniń jetekshisi Baqytjan Áshirbekov segiz aıda atqarylǵan jumystardy baıandady.
Onyń aıtýynsha, Túrkistan oblysynda «Rýhanı jańǵyrý» baǵdarlamasynyń 6 basymdyǵy, ıaǵnı básekelik qabilet, pragmatızm, ulttyq biregeılikti saqtaý, bilimniń saltanat qurýy, Qazaqstannyń revolıýtsııalyq emes, evolıýtsııalyq damýy, sananyń ashyqtyǵy negizinde 6 arnaıy joba ázirlenip, naqty is-sharalar júzege asyrylǵan. Jobalyq keńsede 46 joba ázirlenip, 168 is-shara qolǵa alynǵan. Sondaı-aq, bıyl oblystyń shejireli oryndary týraly ańyz-áńgimeler jınaǵy jáne týrızmi men tarıhynan syr shertetin fotoalbomdar daıyndalyp jatyr. Dálirek aıtqanda, ońtústik óńiriniń ańyz-ápsanalarynan jınaq shyǵaryldy. «Túrkistannyń kóne qalalary», «Túrkistannyń tańǵajaıyp tabıǵaty» fotoalbomy jaryq kórmek.
Jıynda «Ólketaný» jobasynyń avtorlarynyń biri, tarıhshy ustaz Ómir Shynybekuly, «ıÝjnyı Kazahstan» gazeti bas redaktorynyń orynbasary Keńesbaı Ismaılov, «Ońtústik Qazaqstan» gazetiniń dırektor-bas redaktory Abaı Balajan, belgili shejireshi-qalamger Mombek Ábdiákimuly men «Qazaqstan joly» gazetiniń bas redaktory Ońǵar Tájıevtiń pikirleri tyńdaldy. Sonymen qatar, ózge de azamattar óz oılaryn ortaǵa salyp, «Rýhanı jańǵyrý» baǵdarlamasyn tıimdi júzege asyrý jónindegi usynystaryn aıtty. Bul usynystardyń mańyzdylary eskerilip, óńirlik Jobalyq keńseniń jumys josparyna engiziletin bolady.
