Túrkistan oblysynda 24 myńnan astam túlek mektep bitiredi
TÚRKІSTAN. QazAqparat - Túrkistan oblysynda aǵymdaǵy jyly mektepti 24 myńnan asa túlek támamdaıdy. Naýryz aıynda 14 375 túlek aqyly testke qatysyp, bilimderin synaǵan. Bul týraly oblysy ákimi Ómirzaq Shókeevtiń tóraǵalyǵymen ótken apparat májilisinde sóz boldy, dep habarlaıdy QazAqparat tilshisi.
Jıynda 2018-2019 oqý jylynyń aıaqtalý barysy men aldaǵy ýaqytta ótetin UBT-ǵa daıyndyq máselesi aıtyldy. Oblystyq bilim basqarmasy basshysynyń mindetin atqarýshy A.Sadyqova atap ótýinshe, 2018-2019 oqý jylynda oblysta 24 061 oqýshy 11-synypty támamdaıdy.
«Mektep bitirýshilerdiń ómir qaýipsizdigin qamtamasyz etý maqsatynda mektep bitirýshi túlekterdiń sońǵy qońyraý kúni jeńil kólikpen júrýlerine qatań tyıym salý jóninde aýdan, qala ákimderine jáne bilim bóliminiń basshylaryna hat joldandy. Mınıstrliktiń Ulttyq biryńǵaı testileýdi ótkizý qaǵıdalaryna sáıkes, Ulttyq biryńǵaı testileý 2019 jyldyń 20 maýsym - 5 shilde aralyǵynda ótkiziledi. UBT-ǵa qatysý qujattar qabyldaý aǵymdaǵy jylǵy 1 sáýir - 10 mamyr aralyǵynda júzege asyryldy», - dedi ol.
Oblystyq bilim basqarmasy basshysy mindetin atqarýshysynyń baaıandamasyn tyńdaǵan Ómirzaq Shókeev aýdandardaǵy oqý ordalarynyń jaı-kúıin retteýdi tapsyrdy. Bul turǵyda memlekettik-jekeshelik áriptestik aıasynda jańa nysandardyń qurylysyn bastaý kerektigin atap ótti.
Aımaq basshysy sonymen qatar májiliste oblystyń ońtústik óńirlerindegi aýdandardyń áleýmettik, ekonomıkalyq turǵydan baıaý damyp jatqanyn aıtty.
«Oblystyń ońtústik óńirlerindegi Shardara, Saryaǵash, Keles, Jetisaı, Maqtaaral aýdandarynda jol, qurylys, ınfraqurylym, abattandyrý, gazdandyrý jumystary baıaý, nashar jaǵdaıda qalyp otyr. Áleýmettik nysandardyń da kóbisiniń tozyǵy jetken. Damýy qarqyndy Otyrar, Sozaq, Báıdibek aýdandarynan ózge óńirler tájirıbe almasýy qajet. Elge qajetti áleýmettik nysandar, sport alańshalary, saıabaqtar, avtomobıl joldary retke kelýi kerek. Atalǵan aýdandardy damytýdy jeke qadaǵalaýyma alamyn. Jergilikti ákimderden belsendi jumys júrgizýdi talap etemin», - dedi Ómirzaq Shókeev.
