Túrkistan oblysynda 22 maıdanger turady

TÚRKІSTAN. QazAqparat - Túrkistan oblysynda Ekinshi dúnıejúzilik soǵys ardagerlerine 1 mıllıon teńgeden, al soǵys qatysýshylary men múgedekterine teńestirilgen azamattarǵa 100 myń teńgege deıin birjolǵy kómek beriledi, dep habarlaıdy QazAqparat tilshisi.

Búginde Túrkistan oblysynda 22 maıdanger men soǵys múgedeginiń kózi tiri. Sondaı-aq óńirde 5125 tyl eńbekkeri turyp jatyr.

Al soǵys qatysýshylary men múgedekterine teńestirilgender sany - 154.

Jyl saıyn Jeńis kúni merekesine oraı atalǵan sanattaǵy ardagerlerge turaqty túrde qoldaý kórsetilip keledi.

Qazaqstan Respýblıkasy boıynsha Ekinshi dúnıejúzilik soǵys ardagerleri men olarǵa teńestirilgen azamattarǵa birdeı mólsherde birjolǵy materıaldyq kómek berý josparlanyp, jergilikti bıýdjetten qarjy qarastyryldy.

Osylaısha, soǵys ardagerlerine 1 (bir) mıllıon teńgeden, soǵys qatysýshylary men múgedekterine teńestirilgen azamattarǵa 30-100 myń teńge aralyǵynda birrettik materıaldyq kómek berilýde.

Jeńis merekesi qarsańynda Túrkistan oblysyndaǵy bilim uıalary men sporttyq alańdarynda patrıottyq baǵyttaǵy tárbıe saǵattary, kezdesýler men kontsertter uıymdastyrylyp jatyr.

Sonymen qatar jergilikti mekemeler basshylarynyń jáne Ardagerler keńesi tóraǵalarynyń, qoǵamdyq uıymdar, saıası partııalardyń qatysýymen maıdangerler men tyl eńbekkerlerine qurmet kórsetilmek.