Túrkistan oblysynda 2012 jyly ushaq apatynan qaza tapqan shekarashylarǵa eskertkish taqta qoıyldy
TÚRKІSTAN QazAqparat - Túrkistan oblysynda osydan segiz jyl buryn 27 áskerı qyzmetshiniń ómirin qıǵan AN-72 áskerı ushaǵy apat bolǵan orynda, sondaı-aq UQK Shekara qyzmeti barlyq aýmaqtyń bólimshelerinde eske alý jıyny ótti, dep habarlaıdy QazAqparat.
Oblys ákimi baspasóz qyzmetiniń málimetinshe, sharaǵa din ókilderi jáne «Zastava tarlandary» respýblıkalyq qoǵamdyq birlestigi fılıalynyń ardager shekarashylary, sondaı-aq qaıtys bolǵandardyń jaqyndary, týǵan-týystary qatysqan.
UQK Shekara qyzmeti Túrkistan oblysy boıynsha departamenti áskerı qyzmetshileriniń bastamasymen óz eliniń naǵyz patrıottary – Otan saqshylaryn ulyqtaı otyryp, ushaq apaty bolǵan orynǵa memorıaldyq taqta ornatyldy.
Qulpytasqa máńgilik mekenge attanǵan shekarashylardyń aty-jóni jazyldy.
Memorıal basynda ońtústik shekarashylary marqum bolǵan qarýlastarynyń qurmetine duǵa-tilekterin arnap, gúl shoqtaryn qoıdy.
2012 jyldyń 25 jeltoqsany kúni memleketimizde qaraly kún jarııalanǵan edi.
Qystyń osynaý bir qytymyr kúninde bolǵan bul qaıǵyly jaǵdaı táýelsiz el tarıhynda bolǵan eń aýyr oqıǵa edi.
