Túrkistan oblysynda 200-ge jýyq naýqas pnevmonııadan jazylyp, aýrýhanadan shyqty
TÚRKІSTAN. QazAqparat - Oblys turǵyndary tumaýdyń belgilerimen dárigerlik kómekke jıi júginýde. Medıtsınalyq tekserý nátıjesinde naýqastardan pnevmonııa, ıaǵnı ókpeniń qabynýy anyqtalǵan, dep habarlaıdy QazAqparat óńirlik kommýnıkatsııalar qyzmetine silteme jasap.
Statıstıka boıynsha qazirgi tańda Túrkistan oblysy boıynsha provızorlyq aýrýhanalarda 958 naýqas pnevmonııadan em qabyldap jatyr. Onyń ishinde, Túrkistan qalalyq aýrýhanasynda - 50, Kentaýda - 180 adamǵa em júrgizilýde.
Pnevmonııadan 198 naýqas jazylyp shyqsa, 1 maýsymnan beri oblys kóleminde 23 adam atalǵan dertten kóz jumdy. Aıta ketetini, kórsetkish halyqtyń beıqamdyǵynan kóterilip otyr.
Bul týraly búgin óńirlik kommýnıkatsııalar qyzmetinde ótken brıfıngte oblystyq qoǵamdyq densaýlyq basqarmasynyń basshysy Marat Pashımov málimdedi.
Onyń aıtýynsha, áleýmettik jelilerdegi aýrýhanalarda oryn jetispeýshiligi týraly aqparat shyndyqqa janaspaıdy. Aýrýhanalarda naýqastarǵa tósek-oryn jetkilikti.
«Qazirgi tańda oblys kóleminde dári-dármek qory men ottegi oryndary jetkilikti. Іndetke qajetti antıbıotıktardy aldyrýdamyz. Sondaı-aq, aýrýhanalarda tósek-oryndar boıynsha tapshylyq joq. Qosymsha oryndar ázirlengen. Máselen, Kentaý qalalyq ortalyq aýrýhanasynda 50 oryndyq somatıkalyq bólimshe qaıta beıimdelip, qosymsha 200 oryndyq tósek-oryn, 16 ottegi oryndary daıyndaldy. Al Túrkistan qalalyq ortalyq aýrýhanasynda qosymsha 270 tósek-oryn ázirlengen. Oryn alǵan jaǵdaıǵa baılanysty Túrkistan jáne Kentaý qalalarynda naýqastardy josparly jatqyzý toqtatylǵan. HQTÝ, «Akmaral» , «Klınıka Talǵat» syndy jeke klınıkalar da ózderine bekitilgen turǵyndarǵa tıisti medıtsınalyq qyzmet kórsetýde», - dedi Marat Orynbasaruly.
Sonymen qatar, brıfıngke qatysqan Túrkistan qalalyq ortalyq aýrýhanasynyń bas dárigeri Janbolat Dildábekov oblys ortalyǵynda ekpe bólmeleriniń tapshylyǵyna baılanysty qosymsha oryndar daıarlanǵanyn jetkizdi.
Sondaı-aq, qalalyq aýrýhanada tósek-oryn sany artyp, naýqastarǵa qajetti dári-dármek qosymsha alynyp jatqanyn jetkizdi.
