Túrkistan oblysynda 20 jyl buryn mektep bitirgen túlekter 6 otbasyna baspana syılady

TÚRKІSTAN. QazAqparat- Túrkistan oblysynda 20 jyl buryn mektep bitirgen túlekter 6 otbasyna baspana syılady, dep habarlaıdy QazAqparat tilshisi.

Túrkistan oblysynda ár jyldary mektep bitirgen túlekter áleýmettik jaǵdaıy tómen jerlesterine úı salyp berýdi ádetke aınaldyrǵan. Igi is bıylǵy jyly da óz jalǵasyn tapty.

Máselen, Túlkibas aýdanyna qarasty Abaı atyndaǵy jáne B.Sadyqov mektebiniń 20 jyldyq túlekteri muqtaj otbasyǵa aýdan ortalyǵynan qorasy, monshasy, saraıy bar alty bólmeli úı syılady. Sondaı-aq, jınalǵan 8 mln. 600 000 teńgege úıdiń ishine qajetti jıhaz-tehnıkalar satyp ápergen. Al, Arys qalasyndaǵy Baıyrqum aýylynda 20 jyl buryn mektep bitirgen oqýshylar ózderi bilim alǵan mektepke 3 mln teńgege demeýshilik jasady. Bul qarajatqa bilim uıasyndaǵy tozyǵy jetken oqý ústelderi tolyǵymen jańartyldy. Sonymen qatar, túlekter mektepke qoǵam qaıratkeri, belgili aqyn Muhtar Shahanovty arnaıy shaqyryp, rýhanı mazmuny mol kezdesý uıymdastyrǵan.

Al, Shardara aýdanyna qarasty, Qosseıit aýyldyq okrýgindegi «Syrdarııa» jalpy orta mektebiniń 2003 jylǵy túlekteri kópbalaly otbasyǵa úsh bólmeli turǵyn úı tartý etti. Budan bólek, Ordabasy aýdanyndaǵy Tórtkúl eldimekeninde turatyn 1985-1986 jylǵy týǵan túlekter tórt balasy bar jalǵyzbasty anaǵa baspana salyp berdi.

Igi dástúr aıasynda Keles aýdanyna qarasty Aqtóbe aýyldyq okrýginde de jalǵasty. Munda da baspanasy joq bir otbasy úıli boldy. Birlik aýyldyq okrýgindegi №57 Á.Jangeldın atyndaǵy jalpy orta bilim beretin mekteptiń 2003 jylǵy túlekteri alleıa salyp berdi. Keleske qarasty Aqtóbe aýyldyq okrýgindegi №40 Ǵ.Muratbaev atyndaǵy jalpy orta mektebiniń túlekteri qoǵam qaıratkeri Ǵanı Muratbaevtyń qurmetine eskertkish ornatty.

Saýapty isten Jetisaılyqtarda shet qalǵan joq. Aýdanǵa qarasty Maqtaly aýyldyq okrýgindegi mektep túlekteri aýyl jurtshylyǵyna Ońalbek Tastanbekuly atyndaǵy ámbebap sport keshenin syıǵa tartty. Osy ýaqytqa deıin aýylda zaman talabyna saı sport kesheni bolmaǵan. Ǵımaratta endi aýyl turǵyndary sporttyń kúres, boks, aýyr atletıka jáne qol kúresi syndy túrlerimen jattyǵa alady. Sportty jaqsy kóretin aýyl jastary úshin bul – tamasha syılyq bolyp otyr.

Kentaýǵa qarasty Baıyldyr aýylyndaǵy mektepti 2003 jyly bitirgen túlekter aýyl turǵyndaryna jańa aıaldama tartý etti. Aıaldama elektr jaryqshamdarmen jabdyqtalyp, jyldyń tórt mezgiline arnap salynǵan.

Sondaı-aq Sozaq aýdanynda qos birdeı otbasyǵa turǵyn úı kilti tabystaldy. Aýdan ortalyǵynda T.Álimqulov atyndaǵy mektep-lıtseı ınternaty men A.Baıtursynov atyndaǵy jalpy orta mektepti bitirgenine 20 jyl bolǵan túlekter Sholaqqorǵan aýylynyń turǵyny, kópbalaly otbasyna jańa baspanany tartý etti.

Jer ýchaskesi 15 sotyqty quraıdy. Qosalqy sharýashylyqty damytýǵa jáne baý-baqsha ósirýge múmkindik beredi.

Al, Taýkent kentindegi І.Keńesbaev atyndaǵy jalpy orta mektebinen túlep ushqan azamattar mektepti bitirgenderine 20 jyl tolýyna oraı kópbalaly, jalǵyzbasty anaǵa kópqabatty turǵyn úıdiń birinen páter kiltin tabystap, qýanyshqa bóledi.

Qos baspana da ashana jáne úıge qajetti turmystyq jabdyqtarmen qamtylǵan.

Turǵyn úı ıeleri uzaq jyldar boıy jaldamaly páterdi panalap kelgen. Búgingi kúndegi qýanyshtaryn jasyra almaı, ıgi iske uıytqy bolǵan jastarǵa alǵystaryn aıtty.

Foto: Túrkistan ómirlik kommýnıkatsııa qyzmeti