Túrkistan oblysynda 2 myńnan asa adamdy kene shaqty
TÚRKІSTAN OBLYSY. QazAqparat - Bıyl Túrkistan oblysynda 2 myńnan asa adamdy kene shaqqan. Zııandy jándikten 4 adam Kongo-qyrym qandy bezgegin juqtyryp, bir naýqas kóz jumǵan. Bul týraly oblystyq Aýyl sharýashylyǵy basqarmasynyń basshysy Serik Turbekov málim etti, dep habarlaıdy QazAqparat tilshisi.
Basqarma basshysynyń sózinshe, kene shaǵý faktileri negizinen jaıylymdar men qoralary bar úılerde tirkelgen. Alaıda, shomylatyn oryndar men saıabaqtarda da jándikter kóbeıgeni baıqalǵan.
«Bıyl Túrkistan oblysynda 2 myńnan asa adamdy kene shaqty. Oqıǵalar byltyrǵy jyldyń osy kezeńimen salystyrǵanda 387 jaǵdaıǵa kóbeıip otyr. Qazir jaýapty mekemelermen jumys istep jatyrmyz. Aıta keteıik, byltyr Kongo-qyrym qandy bezgegin týǵyzatyn keneler 8 adamdy shaqqan. Onyń ekeýi qaıtys boldy. Bıyl bir adam kóz jumdy», - deıdi Serik Turbekov.
Óńirde kenege qarsy dárileý jumystary qora-qopsylar men jaıylymdarda júrgizilgen. Degenmen sala mamandary keneler kezdesetin barlyq jerlerdi zalalsyzdandyrý múmkin emestigin aıtýda. Sondyqtan turǵyndardy meılinshe saqtyq sharalaryn qoldanýǵa shaqyrdy.
