Túrkistan oblysynda 2 myńǵa jýyq oqýshy apatty mektepte bilim alyp júr
TÚRKІSTAN. QazAqparat - Qazirgi kezde Túrkistan oblysynda 4 apatty mektep bar. Onda eki myńǵa jýyq oqýshy bilim alyp jatyr, dep habarlaıdy QazAqparat tilshisi.
Jalpy Túrkistan oblysynda 2025 jylǵa deıin 199 mektep salý josparlanǵan. Búginde atalǵan bilim ordalarynyń qurylysy kezeń-kezeńimen júrgizilip jatyr.
Máselen, bıyl óńirde 59 mekteptiń qurylys jumysyna 20,7 mlrd teńge qarjy qaraldy.
Josparǵa sáıkes onyń 34-niń qurylysy jyl sońyna deıin aıaqtalýy tıis.
Bıyl bıýdjet qarjysy esebinen 21 mektep, jekemenshik 13 mekteptiń qurylysy aıaqtalyp, el ıgiligine tabystalýy tıis.
«Jańa oqý jylynyń qarsańynda 5 mektep paıdalanýǵa berildi. Al, jyl sońyna deıin 16 bilim ordasynyń qurylysy aıaqtalady dep josparlanýda. Onyń ishinde, 4 apatty jáne 2 úsh aýysymdy mekteptiń qurylysy júrip jatyr»,-delingen Túrkistan oblysy adamı áleýetti damytý basqarmasynyń baspasóz qyzmeti taratqan aqparatta.
