Túrkistan oblysynda 180 adam kókparǵa jınalǵan

TÚRKІSTAN. QazAqparat – Túrkistan oblysynyń polıtsııa qyzmetkerleri karantın talaptaryn elemeı, kókpar uıymdastyrǵan azamattardy anyqtady, dep habarlaıdy QazAqparat tilshisi Polisia.kz aqparat kózine silteme jasap.

Túrkistan oblysynyń bas sanıtarlyq dárigeriniń qaýlysyna sáıkes, azamattar karantın talaptaryn saqtap, medıtsınalyq maska taǵyp, áleýmettik aralyqty saqtaýy kerek. Óńirdiń mobıldi toptary turaqty túrde aldyn alý sharalaryn ótkizip, karantın talaptarynyń buzylmaýyn qadaǵalaýda. Osyndaı tekserýlerdiń birinde Tóle bı aýdanynyń polıtsııa qyzmetkerleri kókpar tartý jaǵdaıyn anyqtaǵan. Tekserý barysynda jergilikti turǵynnyń Alataý aýyldyq okrýginde 100-ge tarta adamdy jınap, kókpar uıymdastyrǵany belgili boldy.

Mobıldi toptyń ókilderi jınalǵan azamattarǵa túsindirý jumystaryn júrgizgen, karantın talaptarynyń buzylmaýy kerektigin eskertip, barlyǵyn úılerine tarqatqan.

Dál osyndaı jaǵdaı Qazyǵurt aýdanynda da tirkelgen eken. Yzabulaq aýylynyń turǵyny jaıylym jerdiń birinde kókpar uıymdastyrǵan. Polıtsııa qyzmetkerleri ol jerde de túsindirý jumystaryn júrgizdi. Al 80 adamdy jınaǵan azamat jaýapkershilikke tartyldy.

Kókpar uıymdastyrǵan tulǵalar Ákimshilik kodekstiń 425-baby (Halyqtyń sanıtarııalyq-epıdemıologııalyq salamattylyǵy salasyndaǵy zańnama talaptaryn, sondaı-aq gıgıenalyq normatıvterdi buzý) boıynsha jaýapkershilikke tartyldy.