Túrkistan oblysynda 170-ke tarta ınvestıtsııalyq joba júzege asyrylýda
TÚRKІSTAN.QazAqparat - Túrkistan oblysynda ótken jyly respýblıkalyq jáne oblystyq bıýdjet qarajaty esebinen 38,7 mlrd teńgege 169 ınvestıtsııalyq jobanyń qurylysy júrgizildi.
Bul týraly búgin oblystyq qurylys basqarmasynyń basshysy Toqtar Úsipálıev óńirlik kommýnıkatsııalar ortalyǵynda ótken baspasóz máslıhatynda málimdedi, dep habarlaıdy QazAqparat tilshisi.
Toqtar Úsipálıevtiń sózinshe, jobalardyń 71-i paıdalanýǵa berilse, qalǵan 98 nysannyń qurylysy 2019 jylǵa ótpeli. Al, jobalarǵa qarastyrylǵan qarajattyń basym bóligi bilim salasyna jumsalǵan. Atap aıtqanda, 80 nysannyń qurylys jumystaryna dep 17,9 mlrd teńge bólingen. Onyń 39-y el ıgiligine berilse, 41-i aǵymdaǵy jyly tapsyrylady.
«Densaýlyq saqtaý salasy boıynsha 5,8 mlrd teńgege 11 nysannyń qurylysy júrgizildi. Onyń 2-eýi osy jyly tapsyrylyp, 9 nysannyń qurylysy jospar boıynsha aıaqtalýy tıis. Al, sport salasyna 1,262 mlrd teńge bólinip, 3 nysan boı kóterdi. 202,7 mln teńge mádenıet salasyna qaralyp, 2 nysan salyndy. Sondaı-aq, oblystyq bıýdjet esebinen 59 mln teńge bólinip, 2 nysannyń qurylysy bastaldy. Nysandar aǵymdaǵy jylǵa ótpeli», - dedi basqarma basshysy.
Óńirdiń bas qurylysshysy sondaı-aq 2018 jyly «Nurly jer» baǵdarlama aıasynda 344,7 myń sharshy metr turǵyn úıdi paıdalanýǵa berý josparlanǵanyn atap ótti. Jalpy aýmaǵy 387,8 myń sharshy metr bolatyn 3003 páter el ıgiligine tapsyrylǵan. Bul ótken jyldyń tıisti kezeńimen salystyrǵanda 121,7 paıyzǵa artyq.
«Oblysta áleýmettik sala qyzmetkerlerine arnalǵan 32 eki qabatty turǵyn úı qurylysyna 1 929,1 mln teńge qarjy qarastyryldy. Búgingi tańda 13 turǵyn úıdiń qurylysy aıaqtaldy. Qalǵan baspanalar 2019 jyly paıdalanýǵa beriledi. Al, Túrkistan qalasynda «ÁKK Túrkistan» AQ-y jáne jeke salýshy arqyly kólemi 26,1 myń sharshy metr bolatyn 336 páterli 6 kópqabatty turǵyn úıdiń qurylysy bastaldy. Bul ǵımarattar 2019 jyldyń 3-toqsanynan bastap, «7-20-25» baǵdarlamasy arqyly halyqqa usynylady»,- dedi Toqtar Úsipálıev.
Belgili bolǵandaı, basqarma tarapynan bıyl 39,6 mlrd teńgege 148 ınvestıtsııalyq joba iske asyrylmaq. Olardyń 81-i aǵymdaǵy jyly paıdalanýǵa berilse, 67 nysan qurylysy kelesi jylǵa ótpeli. Atap aıtqanda, bilim berý salasynda - 69, densaýlyq saqtaý salasynda- 4, ishki ister organy - 2, turǵyn úı qurylysy boıynsha - 62, ınjenerlik ınfraqurylymmen qamtamasyz etý maqsatynda - 10, qorshaǵan ortany qorǵaý boıynsha 1 nysannyń qurylysy júrgiziledi.
