Túrkistan oblysynda 17 jeke sot oryndaýshynyń lıtsenzııasy toqtatyldy

TÚRKІSTAN. QazAqparat – «Nur Otan» Túrkistan oblystyq fılıaly janyndaǵy Sybaılas jemqorlyqqa qarsy is-qımyl jónindegi Qoǵamdyq Keńestiń kezekti otyrysy ótti. Keleli basqosýda oblystyq jeke sot oryndaýshylar tarapynan atqarýshylyq qujattardy oryndaý barysynda qoldanystaǵy zańdardyń saqtalýy talqylandy, dep habarlaıdy QazAqparat tilshisi.

Kún tártibine sáıkes, oblystyq prokýratýranyń basqarma prokýrory Almasbek Mombekovtyń baıandamasy tyńdaldy. Onyń aıtýynsha, jyl basynan beri prokýratýramen jeke sot oryndaýshylardyń is júrgizýindegi atqarý óndirisine júrgizilgen taldaýlar men tekserýlerdiń nátıjesimen birqatar zań buzýshylyqtar anyqtalǵan. Prokýrorlyq qadaǵalaý aktileri engizilip, tıisti organdarǵa 9 narazylyq pen 5 tártiptik is qozǵaý jáne 82 usynystary joldanǵan. Taldaý nátıjesimen 151 sot oryndaýshy jaýapkershilikke tartylyp, taǵy 17 jeke sot oryndaýshynyń lıtsenzııasy ýaqytsha toqtatylǵan.

Keńes otyrysynda Túrkistan oblysy Ádilet departamentiniń basshysy Muhıt Turǵaraev baıandama jasap, atqarylyp jatqan jumystar boıynsha málimet berdi. Baıandamashynyń sózinshe, óńirde alımentti tóletý, aılyq jalaqy óndirý, memlekettik qyzmet kórsetýge qatysty aryz-shaǵymdar azaıar emes.

Qoǵamdyq keńes músheleri sot oryndaýshylar zań aıasynda halyqqa sapaly qyzmet kórsetý kerektigin aıtyp, usynystaryn jetkizdi. Alıment tóleı almaı júrgen boryshkerlerdi jumyspen qamtý, sot oryndaýshylardyń etıkasyn jaqsartý, jumys kabınetterine senim telefonyn ornatý sekildi máselelerge nazar aýdarý kerektigin sóz etti.

Jıyn qorytyndysynda «Nur Otan» partııasy Túrkistan oblystyq fılıaly janyndaǵy Sybaılas jemqorlyqqa qarsy is-qımyl jónindegi Qoǵamdyq Keńestiń qaýlysy qabyldandy.