Túrkistan oblysynda 17 myńnan astam jobaǵa jeńildetilgen nesıe bólingen
ASTANA. QazAqparat - Túrkistan oblysynda «YRYS» mıkroqarjy uıymy 2009-2018 jyldar aralyǵynda óńirdiń 17 382 turǵyny jeńildetilgen nesıe jáne lızıngke qol jetkizip, kásipkerlikpen aınalysyp keledi.
Qarjylandyrylǵan jobalar nátıjesinde jumyspen qamtylǵandar sany 16 525 adamǵa jetken. Jalpy qarjylandyrylǵan 17 myńnan astam jobany júzege asyrýǵa 34,1 mlrd. teńge baǵyttaldy. Bul týraly Túrkistan oblysy Óńirlik kommýnıkatsııalar qyzmetinde ótken brıfıngte «Yrys» mıkroqarjy uıymynyń dırektory Danııar Arynǵazın málim etti.
«YRYS» MQU ótken jyly 4 mlrd. 539,5 mln. teńgege 1243 jobany qarjylandyryp, júzege asqan jobalar sheńberinde 1400-ge jýyq jańa jumys orny ashylǵan.
«2018 jyly qarjylandyrylǵan jobalar kelesi basym baǵyttar aıasynda júzege asyryldy: mal sharýashylyǵynda - 2 mlrd. 199,2 mln. teńgege 384 joba, dala jumystary boıynsha - 1 mlrd. 518,8 mln. teńgege 766 joba, óndiris salasynda - 28 mln. teńgege 3 joba, jylyjaı boıynsha - 123 mln. teńgege 15 joba, qyzmet kórsetý aıasynda - 425,1 mln. teńgege 53 joba, qus sharýashylyǵynda - 11,9 mln. teńgege 6 joba qarjylandyryldy», - dedi Danııar Manatjanuly.
Búginde «YRYS» mıkroqarjy uıymynyń nesıe qorjyny 34,1 mlrd. teńgege jetken. Uıymnyń nesıe qorjynynyń basym bóligin mal sharýashylyǵy quraıdy.
Budan ózge, «YRYS» mıkroqarjy uıymy 2017 jyldyń jeltoqsan aıynan bastap jas kásipkerlerge kómek retinde «Jas kásipker» baǵdarlamasyn qolǵa alǵan. Baǵdarlama talaby boıynsha jasy 18-29 jas aralyǵyndaǵy jas kásipkerlerge 2 mln.teńgege deıin jeńildetilgen nesıe kepil múlki nemese alǵashqy jarna talap etilmeı-aq berilip keledi. Joba búgingi kúni sátti júrgizilip, 20 mln. teńgeni quraıtyn 10 úzdik joba qarjylandyryldy.
