Túrkistan oblysynda 17 myńnan astam joba jeńildetilgen nesıemen qarjylandyrylǵan
TÚRKІSTAN. QazAqparat - Túrkistan oblysynda 17 myńnan astam joba jeńildetilgen nesıemen qarjylandyrylǵan. Bul týraly búgin Óńirlik kommýnıkatsııalar qyzmetinde ótken brıfıngte «Yrys» mıkroqarjy uıymynyń dırektory Danııar Arynǵazın málim etti, dep habarlaıdy QazAqparat tilshisi.
Danııar Arynǵazınnyń sózinshe, 2009-2018 jyldar aralyǵynda óńirdiń 17 382 turǵyny jeńildetilgen nesıe jáne lızıngke qol jetkizip, kásipkerlikpen aınalysyp keledi. Qarjylandyrylǵan jobalar nátıjesinde 16 525 adam jumyspen qamtylǵan. Jalpy qarjylandyrylǵan 17 myńnan astam jobany júzege asyrýǵa 34,1 mlrd teńge baǵyttalǵan. Sondaı-aq ótken jyly 4 mlrd 539,5 mln teńgege 1243 jobany qarjylandyryp, júzege asqan jobalar aıasynda 1400-ge jýyq jańa jumys orny ashylǵan. 
«2018 jyly qarjylandyrylǵan jobalar kelesi basym baǵyttar aıasynda júzege asyryldy: mal sharýashylyǵynda - 2 mlrd 199,2 mln teńgege 384 joba, dala jumystary boıynsha - 1 mlrd 518,8 mln teńgege 766 joba, óndiris salasynda - 28 mln teńgege 3 joba, jylyjaı boıynsha - 123 mln teńgege 15 joba, qyzmet kórsetý aıasynda - 425,1 mln teńgege 53 joba, qus sharýashylyǵynda - 11,9 mln teńgege 6 joba qarjylandyryldy», - dedi Danııar Arynǵazın.
Sala mamandarynyń málimetinshe, búginde atalǵan qarjy uıymynyń nesıe qorjyny 34,1 mlrd teńgege jetken. Uıymnyń nesıe qorjynynyń basym bóligin mal sharýashylyǵy quraıdy. Budan ózge, atalǵan uıym 2017 jyldyń jeltoqsan aıynan bastap jas kásipkerlerge kómek retinde «Jas kásipker» baǵdarlamasyn qolǵa alǵan. Baǵdarlama talaby boıynsha jasy 18-29 jas aralyǵyndaǵy jas kásipkerlerge 2 mln teńgege deıin jeńildetilgen nesıe kepil múlki nemese alǵashqy jarna talap etilmeı-aq berilip keledi. Joba búgingi kúni sátti júrgizilip, 20 mln teńgeni quraıtyn 10 úzdik joba qarjylandyrylǵan.
