Túrkistan oblysynda 17 myń 438 gektar jer memleketke qaıtaryldy
Bul týraly Túrkistan oblysynyń ákimi Ómirzaq Shókeevtiń tóraǵalyǵymen ótken lezdemelik májiliste málim boldy, dep habarlaıdy Túrkistan oblysy ákimdiginiń baspasóz qyzmeti.
Baspasóz qyzmetiniń málimetterine qaraǵanda, jıynnyń kún tártibinde oblystaǵy paıdaldanylmaı jatqan jerlerdi memleketke qaıtarý jumystarynyń barysy týraly, jer salasy boıynsha taldaý jónindegi jumysshy toptyń qorytyndysy tyńdaldy.
Sondaı-aq, Túrkistan oblysynyń 2016 – 2020 jyldarǵa arnalǵan keshendi jospary men mereke kúnderi qaýipsizdik sharalaryn qamtamasyz etý boıynsha sala jetekshileri baıandama jasady.
Túrkistan oblysy ákiminiń ókimine sáıkes, óńirdegi jerlerdi túgendeý jumystary júrýde. Osyǵan oraı qurylǵan arnaıy jumys tobymen aýdan, qala, aýyl okrýgi ákimderiniń 2017 jyldan bergi aralyqta jer qatynastary boıynsha qabyldaǵan qaýlylary men sheshimderin tekserý barysynda birqatar kemshilikter anyqtalǵan.
Zańsyz tabystalǵan jerlerdi májbúrlep memleketke qaıtarý týraly 300-den astam talap – aryz túsken. Onyń jartysyna jýyǵy qanaǵattandyrylyp, 17 myń 438 gektar jer memleketke qaıtarylǵan.
Túrkistan oblysynyń jer ınspektsııasy basqarmasynyń málimetinshe, jalpy oblys boıynsha paıdalanylmaǵan 220 myń 257,5 gektar jer anyqtalǵan. Onyń basym bóligi aýyl sharýashylyǵy maqsatyndaǵy jerler.
Túrkistan oblysynda egistik jer kólemi 980,4 myń gektardy quraıdy. Túgendeý jumystary kezinde 153 myń ga. jer ıgerilmeı kelgeni belgili bolǵan. Jer qorynyń elektrondy bazasy, kezekshi kartasy jasalmaǵan. Osyǵan oraı oblys basshysy barlyq aýdan ákimderine ózekti máselege úlken jaýapkershilikpen qarap, arnaıy jumys josparyn qurýdy buıyrdy. Qaraýsyz qalǵan jerlerdi tıimdi paıdalanýdyń mańyzdylyǵyna toqtalyp, tıisti tulǵalarǵa tapsyrma júktedi.
Apparat otyrysynda Túrkistan oblysynyń 2016 – 2020 jyldarǵa arnalǵan keshendi jospary jaıly baıandama jasaldy. Jospar boıynsha aýyl halqynyń ómir súrý deńgeıin arttyrý úshin bilim berý, densaýlyq, mádenıet, týrızm, sport salalarynda eleýli ózgerister oryn almaq.
Jol, aýyz sý, gaz, kólik, baılanys, jaryq, turǵyn úı qurylysy, agrarlyq sektor men eldi mekenderdegi ınfraqurylymdy damytýmen qatar jumyspen qamtý máseleleri boıynsha naqty sharalar talqylandy. Aldaǵy kúnderi Túrkistan oblysynyń ishki ister departamenti men Tótenshe jaǵdaılar departamentiniń jeke quramy kúsheıtilgen tártipke kóshedi.
Ómirzaq Estaıuly jıynda kóterilgen máselelerdi jan-jaqty qamtı otyryp, mereke kúnderi qyraǵylyqty kúsheıtip, qaýipsizdikti qamtamasyz etýdi buıyrdy. Aýa-raıy buzylǵan jaǵdaıda apattyń aldyn alý úshin qaýpi basym tasjoldardy baqylaýdy tapsyrdy.
