Túrkistan oblysynda 160-tan astam qoı urlaǵan kúdikti ustaldy
TÚRKІSTAN.QazAqparat – Túrkistan oblysynda 160-tan astam qoıdy qoldy etken kúdikti ustaldy. Barymtashy jábirlenýshige 6 mıllıon 380 myń teńge shyǵyn keltirgen, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, Sozaq APB-ne Shymkent qalasynyń turǵyny usaq maldarynyń Sozaq aýdanyndaǵy jaıylymdardyń birinde urlanǵanyn aıtyp aryzdanǵan. Polıtseıler bastapqyda maldardy aýyl aımaqtan, jaıylymnan izdeıdi. Keıinnen tintý sharalaryna tájirıbeli tártip saqshylary tartylyp, izdestirýdi kúsheıtedi. Nátıjesinde kúdikke jábirlenýshiniń malyn baqqan baqtashy iligedi. Ol Jezqazǵan qalasynda qolǵa tústi. Belgili bolǵandaı, Tólebı aýdanynan kelgen malshynyń ózi baǵyp júrgen maldardy satyp, qomaqty qarjymen birge aýdannan izin sýytqany anyqtaldy. Kúdikti Sozaq aýdandyq polıtsııa bólimine jetkizilip, tergeý amaldary júrgizilýde.
«Atalmysh jaıt boıynsha Sozaq APB-niń polıtseıleri sotqa deıingi tergep- tekserýdiń biryńǵaı tizilimine tirkep, QR QK-niń 189-baby «Senip tapsyrylǵan bóten múlikti ıemdenip alý nemese talan-tarajǵa salý» boıynsha qylmystyq is qozǵady. Qazirgi tańda jınaqtalǵan barlyq qujattar naqty sheshim shyǵarylý úshin sotqa joldandy» delingen habarlamada.
