Túrkistan oblysynda 16 zańsyz qurylys nysany súrilgen
TÚRKІSTAN. QazAqparat - Túrkistan oblysy aýmaǵynda byltyr 16 zańsyz qurylys nysandary súrilgen. Onyń ishinde, 6 nysan sot sheshimderimen, 10 nysan túsindirme jumystary arqyly menshik ıeleriniń óz erkimen buzylǵan.
Bul týraly oblystyq memlekettik sáýlet-qurylys baqylaý basqarmasy basshysynyń orynbasary Tartý Baıtursynov óńirlik kommýnıkatsııalar qyzmetinde ótken brıfıngte málimdedi.
«Óńir kóleminde byltyr 715 joba boıynsha nysandardyń qurylys-montajdaý jumystary bastalǵan. Onyń ishinde 356 nysannyń qurylysy bıýdjet qarajaty esebinen, 348 nysannyń qurylysy jeke kásipkerlik qarajaty esebinen jáne 11 joba ınvestıtsııalyq qarjy esebinen salynýda. Sondaı-aq, basqarmada 2020 jyly zań talaptaryn saqtamaı salynǵan 84 qurylys nysanyna tekserý júrgizilip, anyqtalǵan zańbuzýshylyqtar negizinde QR-nyń ÁQBtK-niń baptaryna sáıkes 153 hattama boıynsha jaýapqa tartylǵan»,- dedi Tartý Oryntaıuly.
Baspasóz máslıhatynda málim bolǵandaı zań talaptary saqtalmaǵany úshin jalpy salynǵan aıyppul kólemi 28 935 945 teńgeni quraıdy. Negizinen, basqarma tarapynan 5 memlekettik qyzmet kórsetiledi. Bul qyzmetter 2019 jyldan bastap 100 paıyzǵa elektrondy túrde kórsetilýde. Byltyr qurylys salasynda lıtsenzııa alýǵa, qaıta tirkeýge, attestat alýǵa qatysty barlyǵy 1096-ótinish qabyldanǵan.
