Túrkistan oblysynda 16 márte mal urlaǵan kúdiktiler ustaldy
«Saryaǵash aýdandyq polıtsııa bólimine jergilikti turǵyn aryzdanyp, jylqysynyń jaıylymnan urlanǵany boıynsha shaǵym túsirgen. Atalǵan jaıt QR QK-niń 188-1-baby «Mal urlyǵy» boıynsha tirkeýge alyndy. Habarlama alysymen saryaǵashtyq tártip saqshylarynan jedel-tergeý toby quryldy. Shuǵyl jáne josparlanǵan áreketter nátıjesinde kúdikti retinde Ózbekstan eliniń azamatyn ustady», - delingen habarlamada.
Tekserý kezinde kúdikti jas jigit ózimen birge mal urlyǵymen aınalysqan, ıaǵnı qylmysty uıymdastyrýshy taǵy 2 kúdiktiniń bar ekenin aıtady. Olar kóp uzamaı qolǵa túsken.
«Ustalǵandardyń ekeýi Ózbekstan Respýblıkasynyń azamaty bolsa, bireýi jergilikti turǵyn bolyp shyqty. Tııanaqty tekserý men zerdeleý barysynda osy ustalǵandardyń 16 jaıt mal urlyǵyna qatysy bary anyqtaldy. Al shyǵyn kólemi 10 mln teńgeden joǵary ekeni belgili boldy.
Anyqtalǵandaı, kúdiktiler qylmys jasaý barysynda óz rólderin aldyn ala qurylǵan jospar boıynsha oryndaǵan. Mysaly, basty kúdikti mal jaıylymynda qaraýsyz júrgen jylqy, sıyrlardy baıqaǵan boıda júk kóligine tıep otyrǵan. Sodan sybaılasy ekeýi urlanǵan úı janýarlaryn satyp alýshylarǵa, qasapshyǵa arzan baǵada ótkizgen. Olar urlaǵan oljalaryn «Gazel» markaly kóligimen tasymaldaǵan», - dep tolyqtyrady departamentten.
Polıtsııa aıǵaq zat retinde «Gazel» kóligi men 2 jylqyny tárkiledi. Kúdiktiler qamaýǵa alynyp, sotqa deıingi tergeý amaldary júrip jatyr.