Túrkistan oblysynda 1500 bıznes jobaǵa qoldaý kórsetildi
TÚRKІSTAN. QazAqparat - Túrkistan oblysynda «Bıznestiń jol kartasy 2020» baǵdarlamasy aıasynda 1500 jobaǵa 43 mlrd teńge kóleminde qarjylaı qoldaý kórsetilgen. Nátıjesinde 6 myńnan astam jańa jumys oryndary qurylyp, bıýdjetke 63 mlrd teńgeniń salyǵy túsken. Bul týraly búgin Óńirlik kommýnıkatsııalar qyzmetinde ótken brıfıngte Kásipkerlik jáne ındýstrıaldy ınnovatsııalyq damý basqarmasynyń basshysy Ǵanıbet Áýbákirov málim etti, dep habarlaıdy QazAqparat tilshisi.
Ǵanıbet Áýbákirovtiń sózinshe, atalǵan baǵdarlama aıasynda 4,4 mlrd teńgege 400 jobaǵa qoldaý kórsetilgen. Sondaı-aq, aǵymdaǵy jyldyń qazan aıyna deıin 140 992 shaǵyn jáne orta kásipkerlik sýbektisi tirkelip, onyń 129 myńnan astamy memleketke salyq tólep kelgen.
«Atap aıtqanda, kásipkerlerdiń bankterdegi kredıtteri boıynsha paıyzdyq stavkany sýbsıdııalaýǵa 4,2 mlrd teńge bólinip, 350 joba sýbsıdııalanǵan. Kásipkerlerdiń bankterdegi kredıtteri boıynsha ishinara 102 mln teńge bólinip, 30 joba kepildendirilgen. Shaǵyn kásipkerlik sýbektilerine memlekettik granttar usynýǵa 60 mln teńge qarastyrylyp, 20 jobaǵa memlekettik granttar usynylǵan», - dedi Ǵanıbet Áýbákirov.
Óńirde jyl basynan bergi 9 aı ishinde negizgi kapıtalǵa tartylǵan ınvestıtsııa kólemi 163,5 mlrd teńgeni qurady. Bul turǵyda Sozaq aýdany (26,1 mlrd teńge), Túrkistan qalasy (16,6 mlrd teńge) jáne Shardara aýdany (15 mlrd teńge) kósh bastap keledi. Investıtsııa kózi bolyp tabylatyn jeke ınvestıtsııalar kólemi 94 mlrd teńgege jetken.
Oblys aýmaǵynda ınvestıtsııalardy tartý baǵytynda qolaıly klımat qurý, sondaı-aq aımaqtyń áleýetin arttyrý maqsatynda Elbasynyń 2018 jylǵy 29 qyrkúıektegi Jarlyǵyna sáıkes kópsalaly «TURKISTAN» arnaıy ekonomıkalyq aımaǵy quryldy.
