Túrkistan oblysynda 14 jasar bala káriz sýy jınalatyn shuńqyrǵa qulap kóz jumdy
TÚRKІSTAN. QazAqparat - Túrkistan oblysynda 14 jasar bala káriz sý jınalatyn shuńqyrǵa qulap qaıtys boldy, dep habarlaıdy QazAqparat tilshisi.
Oqıǵa Ordabasy aýdanynyń, Shubarsý aýylynda bolǵan.
102 pýltine habarlasqan jergilikti turǵyn kámeletke tolmaǵan ulynyń 18 jeltoqsan kúni belgisiz baǵytqa shyǵyp, qaıtyp oralmaǵanyn aıtyp, kómek suraǵan.
Joǵalǵan jasóspirimdi izdeýge aýdandyq polıtsııa bóliminiń búkil jeke quramy jumyldyryldy.
Tártip saqshylary jaqyn mańdaǵy aýmaqtardy aralap, kýálardan jaýap aldy.
Іzdestirý sharalary barysynda Ordabasy APB qyzmetkerleri úı aýlasyndaǵy káriz sý jınalatyn shuńqyrdan 14 jasar balanyń denesin tapty.
«Aldyn ala boljam boıynsha, kámeletke tolmaǵan jasóspirim septıkke qulap, qaıtys bolǵan. Saraptamalar taǵaıyndaldy. Qazirgi ýaqytta oqıǵanyń barlyq mán-jaıy anyqtalyp jatyr» delingen Túrkistan oblysy polıtsııa departamentiniń baspasóz qyzmeti taratqan habarlamada.
