Túrkistan oblysynda 1300-den astam jumysshynyń jalaqy qaryzdary qaıtaryldy

TÚRKІSTAN. QazAqparat – Túrkistan oblysynda 1300-den astam jumysshynyń 164 mln teńge jalaqy qaryzdary qaıtarylǵan. Bul týraly búgin óńirlik kommýnıkatsııalar qyzmetinde ótken brıfıngte Eńbek ınspektsııasy basqarmasy basshysynyń mindetin atqarýshy Begman Nurmahanov málim etti, dep habarlaıdy QazAqparat tilshisi.

Begman Nurmahanovtyń aıtýynsha, óńirde ótken jyldyń qorytyndysymen 11 kásiporyn men mekemelerde 1344 jumysshy aldynda 214,3 mln teńge jalaqy qaryzdary anyqtalǵan. Júrgizilgen jumystardyń nátıjesinde 8 kásiporynda jalaqy qaryzdary tólenip, myńnan asa jumyskerdiń eńbek quqyqtary qorǵalǵan. Budan ózge, byltyr basqarma tarapynan 1089 azamattyń aryz-shaǵymdary qaralyp, olardyń barlyǵyna zańmen belgilengen merzimde jaýap berilgen.

«Azamattardyń aryz-shaǵymdarynyń 36% - jalaqy tóleý merziminiń saqtalmaýyna baılanysty bolsa, 25% - eńbek shartyn buzý, 12% - eńbek demalysyn ýaqytyly bermeý jáne 4% - jumys ýaqyty normasyn buzý máselesin kótergen. Ótken jyly mekemeler men kásiporyndarda barlyǵy 397 tekserý júrgizildi. Nátıjesinde 445 zań buzýshylyq anyqtalyp, onyń 97,3%-y joıyldy. Qalǵandarynyń oryndaý merzimi bar», - dedi Begman Jamalbekuly.

Aıta ketken jón, oblysta sheteldik 22 uıymda 7684 azamat jumys isteıdi. Áleýmettik daýlarǵa jol bermeý maqsatynda sheteldiń qatysýymen qurylǵan kásiporyndarda eńbek qatynastary boıynsha zań jáne normatıvtik aktilerdiń saqtalýy men oryndalýy basqarmanyń turaqty baqylaýyna alynǵan.