Túrkistan oblysynda 130 jańa mektep salynady
NUR-SULTAN. QazAqparat – 2025 jylǵa deıin Túrkistan oblysynda 570 tósektik kóp beıindi aýrýhana, 500 oryndyq úsh emhana, jedel medıtsınalyq járdem stantsııasy, Ana men bala ortalyǵy salynady, dep habarlaıdy QazAqparat tilshisi.
Bul týraly Ulttyq ekonomıka mınıstri Áset Erǵalıev Úkimet otyrysynda málim etti.
«Densaýlyq saqtaý salasynda 570 tósektik kóp beıindi aýrýhana, aýysymda 500 adam qabyldaıtyn úsh emhana, jedel medıtsınalyq járdem stantsııasy, sondaı-aq Ana men bala ortalyǵy salynady. 3 aýysymdy jáne apatty mektepterdi joıý, sondaı-aq oqýshy oryndarynyń tapshylyǵyn azaıtý maqsatynda 130 jańa mektep salynady», - dedi Ulttyq eonomıka mınıstri.
Sonymen qatar, Nazarbaev zııatkerlik mektebi men jataqhanasy bar «Daryn» mektep-ınternatynyń qurylysy josparlanyp otyr. Áset Erǵalıev Kúltóbe qalashyǵynyń kesenelerin, tarıhı nysandaryn qalpyna keltirý, Túrkistan qalasyndaǵy «Áziret Sultan» mýzeı-qoryǵynyń aýmaǵyn abattandyrý jalǵasatynyn aıtty.
«Al dene shynyqtyrýmen jáne sportpen shuǵyldanatyn azamattardy qamtýdy 45%-ǵa deıin ulǵaıtý boıynsha jumys júrgiziledi. Ol úshin tennıs ortalyǵy, muz saraıy, at-sport kesheni jáne basqa da obektiler salynady», -dedi mınıstr.
