Túrkistan oblysynda 1270 shaqyrym jol salyndy
TÚRKІSTAN. QazAqparat – Túrkistan oblysynda ótken jyly 1 270 shaqyrym jol salynyp, paıdalanýǵa berilgen.
Nátıjesinde óńirdegi oblystyq jáne aýdandyq mańyzy bar avtomobıl joldarynyń jaqsy jáne qanaǵatty jaǵdaıdaǵy úlesi 74,1 paıyzǵa jetip otyr, dep habarlaıdy QazAqparat tilshisi.
Oblystyq ákimdiktiń málimetinshe, aǵymdaǵy jyly bul kórsetkish 77,6 paıyzǵa jetkizilmek.
Josparǵa sáıkes, 2021 jyly oblystyq jáne aýdandyq mańyzy bar avtomobıl joldarynyń jaqsy jáne qanaǵatty jaǵdaıdaǵy úlesin 81,4 paıyzǵa deıin ulǵaıtý kózdelýde. Budan bólek, oblystyq mańyzy bar avtomobıl joldarynyń boıyndaǵy 408 kópirdiń 28-i jóndeýdi talap etedi.
Ótken jyly 5 kópir jóndelgen bolsa, 9 kópirge jobalaý smetalyq qujattary ázirlengen.
Sala mamandarynyń sózinshe, aǵymdaǵy jyly 223 nysan nemese 869,8 shaqyrym jol jóndeýden ótedi dep josparlanǵan. Atqarylatyn jumystardyń basym bóligi Maqtaaral, Jetisaı, Keles, Shardara aýdandaryndaǵy avtomobıl joldaryna tıesili bolmaq.
