Túrkistan oblysynda 12 jastaǵy jasóspirim sýǵa batyp ketti
TÚRKІSTAN. QazAqparat – Túrkistan oblysy, Jetisaı aýdanynda 12 jastaǵy jasóspirim sýǵa batyp ketken. Mektep jasyndaǵy qyzdyń denesi Shardara sý qoımasyndaǵy shomylýǵa arnalmaǵan jerde izdestirildi, dep habarlaıdy QazAqparat tilshisi.
Shymkent qalalyq TJD ishki jáne syrtqy kommýnıkatsııalar tobynyń málimetinshe, súńgýirler izdestirý jumystaryn Qyzylqum aýyldyq okrýgine qarasty Qarasaqal aýyly mańynda júrgizgen. Aldyn ala málimet boıynsha 2008 jyly týǵan jasóspirim keshki saǵat 18:30 shamasynda sýǵa túsýge arnalmaǵan jerde batyp ketken.
«Іzdestirý jumystaryna shymkenttik jedel-qutqarý jasaǵy men Shardara qutqarý beketinen 6 qutqarýshy-súńgýir, 1 júzý quraly men 1 tehnıkasy jumyldyrylǵan. Sondaı-aq, izdestirý jumystaryna qosymsha Túrkistan oblysy TJD 6 qyzmetkeri, 11 aýdandyq polıtsııa qyzmetkeri men týystarynan 5 adam jetken. Olar oqıǵa ornyna saǵat 20:20 kelip, keshki saǵat 21:20-da qyzdyń denesin tapqan» delingen habarlamada.
Aıta keteıik, shymkenttik qutqarýshylar shomylý maýsymy bastalǵaly beri kúsheıtilgen rejımde jumys isteýde. Olar Túrkistan oblysyna da kómek kórsetip, onda 10 ret sýdaǵy izdestirý jumystaryn júrgizgen.
