Túrkistan oblysynda 12 úıdi tonaǵan qylmystyq top ustaldy
TÚRKІSTAN. QazAqparat - Túrkistan oblysynyń polıtseıleri páter urlyǵy men mal urlyǵyna mashyqtanǵan qylmystyq topty ustady, dep habarlaıdy QazAqparat oblystyq PD baspasóz qyzmetine silteme jasap.
2019 jyldyń mamyr aıynda Saryaǵash aýdandyń polıtsııa bólimine jergilikti turǵyn aryzdanady. Onyń aıtýynsha eshkim joqtyǵyn paıdalanyp, túnde belgisiz bireýler tereze arqyly úıine kirip, mıllıon teńgege jýyq aqshasyn alyp ketken. Al, aýdannyń basqa bir turǵyny maýsym aıynda urylar úıine kirip, jatyn bólmeden 1,3 mıllıon teńgege jýyq aqshasy men altyn buıymdaryn urlaǵandyǵy týraly aryzdanady. Osy tektes shaǵymmen polıtsııa bólimine aýdannyń birneshe turǵyny habarlasty, olardyń da aqshalary men baǵaly zattary urlanǵan.
Osy qylmystardy ashý maqsatynda oblystyq PD jáne Saryaǵash aýdanynyń tájirıbeli qyzmetkerlerden quralǵan top quryldy. Polıtseıler Saryaǵash aýdanynyń úsh turǵynyn kúdikti retinde qolǵa túsirdi. Tergeý nátıjesinde kúdiktilerdiń 12 páter urlyǵy men mal urlyǵyna qatystylyǵy aıqyndaldy. Olar shilde aıynda jergilikti turǵynyń qorasynan 2 qoıyn urlap ketken. Kúdiktilerdiń ústinen QR QK-niń «Urlyq» 188-baby boıynsha sotqa deıingi tergep-tekserý amaldary júrgizilýde. Jábirlenýshilerge keltirilgen jalpy shyǵynnyń kólemi 4,5 mıllıon teńgeni qurady. Qazir polıtsııa qylmystyq toptyń oblystaǵy basqa da urlyqtarǵa qatys bar-joqtyǵyn anyqtaýda.
