Túrkistan oblysynda 12 mektep dırektory lıtsenzııalaý normalaryn buzǵan

TÚRKІSTAN. QazAqparat - Túrkistan oblysynda lıtsenzııalaý normalaryn buzǵan mektep basshylaryna aıyppul salyndy. Bul týraly Oqý-aǵartý mınıstrligi Bilim salasyndaǵy sapany qamtamasyz etý oblystyq departamentiniń baspasóz qyzmetinen málim etti, dep habarlaıdy QazAqparat tilshisi.

Túrkistan oblysynda Qazaqstan Respýblıkasynyń zańnamalarynda belgilengen lıtsenzııalaý normalaryn buzǵan 12 mektep basshysy ákimshilik jaýapkershilikke tartyldy. Zańsyzdyqqa jol bergen laýazymdy tulǵalardyń barlyǵy Saýran aýdanyna qarasty mektepterdiń dırektorlary.

«Bilim salasyndaǵy sapany qamtamasyz etý departamentiniń málimetine súıensek, laýazymdy tulǵalar mekteptiń ataýy ózgergennen bastap 30 kún ishinde lıtsenzııany nemese lıtsenzııaǵa qosymshany qaıta resimdeýge tıisti ótinishti bermegen.

Osyǵan baılanysty, 12 mektep dırektoryna 1 863 000 teńge kóleminde aıyppul salyndy», - delingen departament taratqan aqparatta.