Túrkistan oblysynda 12 700 adamǵa ekpe egildi
TÚRKІSTAN. QazAqparat - Túrkistan oblysynda 12 700 adamǵa «Covid-19» indetine qarsy ekpeniń 1-komponenti egildi. Búginde onyń 6 173-i vaktsınatsııanyń ekinshi kezeńinen de ótip úlgergen. Olardyń qatarynda medıtsına jáne polıtsııa qyzmetkerleri men muǵalimder bar, dep habarlaıdy QazAqparat óńir basshysynyń baspasóz qyzmetine silteme jasap.
Bul týraly búgin Óńirlik kommýnıkatsııalar qyzmetinde ótken brıfıngte Qoǵamdyq densaýlyq basqarmasynyń basshysy Marat Pashımov málimdedi.
Ol óńirdegi sońǵy táýlikte 8 adamnan koronavırýs indeti anyqtalǵanyn aıta kele, halyqty indetke qarsy ekpe saldyrýǵa shaqyrdy.
«Oblys aýmaǵynda «Covid-19» indetiniń táýliktik ósimi 0,17 paıyz bolyp otyr. Jalpy pandemııa bastalǵaly atalǵan ınfektsııany juqtyrǵan 4 493 jaǵdaı tirkeldi. Osy tusta «Halyq densaýlyǵy jáne densaýlyq saqtaý júıesi týraly» kodekstiń 77-babyna sáıkes, vaktsına salý tek adamnyń kelisimimen ǵana júzege asatynyn aıtqym keledi. Vaktsınadan bas tartqandar ákimshilik ne qylmystyq jaýapkershilikke tartylmaıdy. Deı turǵanmen, azamattarǵa karantındik talaptardy saqtaǵannan bólek, juqpaly aýrýǵa qarsy vaktsına saldyrýdy usynar edim. Bul álemdik tájirıbe ekenin barshańyz bilesizder. Eger osy tásildi el bolyp qoldasaq, jaman aýrýdy jeńý de ońaı bolatyny sózsiz», – dedi M.Orynbasaruly.
Sondaı-aq, basqarma basshysy qazirgi tańda óńirde aýrýmen kúresýdiń barlyq sharalary qolǵa alynǵanyn aıtty. Jalpy aımaqta 23 429 medıtsına qyzmetkeri bolsa, onyń 5000-nan astamy dárigerler, qalǵandary orta býyn mamandary. Vaktsına saqtaıtyn qoımada kólemi 601 lıtr bolatyn 2 muzdatqysh bar. Sonymen qatar, oblystyq bıýdjet esebinen kólemi 143 lıtrlik 20 muzdatqysh alynǵan. Vaktsınatsııa júrgizýge arnalǵan 65 pýnkt tolyq tońazytqyshpen jabdyqtalǵan. Budan bólek, vaktsınany tasymaldaıtyn kólemi 50 lıtrlik 38 termokonteınermen qamtamasyz etilgen.
Óz kezeginde Sanıtarııalyq-epıdemıologııalyq baqylaý departamenti basshysynyń orynbasary Baqtyoraz Elemesov oblys aýmaǵynda karantın rejıminiń talaptaryn saqtamaı toı jıyndar men túrli sharalardy ótkizý toqtamaı otyrǵanyn jetkizdi. Jyl basynan beri arnaıy mobıldi toptardyń monıtorıng jumystary kezinde oblysta karantın talaptaryna baǵynbaı jumys istegen mekemelerge 1 583 hattama toltyrylǵan. Nátıjesinde 89 158 105 teńge aıyppul salynǵan.
