Túrkistan oblysynda 11 jastaǵy bala káriz qudyǵyna túsip ketken búldirshindi qutqaryp qaldy
ShYMKENT. QazAqparat - Túrkistan oblysynda 11 jastaǵy Beknazar Meırambek 2 jasar búldirshindi ólim aýzynan qutqaryp qaldy. Búgin bul týraly Túrkistan oblysy Óńirlik kommýnıkatsııalar qyzmetinde oblystyq Tótenshe jaǵdaılar departamentiniń bastyǵy Nurǵalı Júnisov málimdedi, dep habarlaıdy QazAqparat tilshisi.
Nurǵalı Júnisovtyń aıtýynsha, Sabyrjan esimdi búldirshin jeke úıdiń káriz júıesiniń shuńqyryna túsip ketken bolatyn.
«2019 jyldyń 2 sáýir kúni saǵat 19:40 shamasynda oınap júrgen balalar №57 turǵyn úıdiń syrtynda ornalasqan jeke úıdiń káriz júıesiniń shuńqyryna kishkentaı búldirshinniń qulap túskenin baıqap qalǵan. Artynsha júgirip kelgen balalarǵa qudyqtyń ishindegi 1 metrden asa las sýdan kishkentaı búldirshin sýǵa bastyp ketken. Osy mezette 2008 jyly týǵan 5-synyp oqýshysy Beknazar Meırambek esh oılanbastan, dereý qudyqtyń ishine túsedi. Las sý moıyn tusyna kelgenine qaramastan, sýǵa tunshyǵyp jatqan 2017 jyly týǵan 2 jasar Baqytbek Sabyrjandy kóterip alyp, shuńqyrdan shyǵarǵan», - dedi departament bastyǵy.
Artynsha 2 jasar aýrýhanaǵa jetkizilip, em qabyldaǵan. Qazirgi tańda onyń densaýlyǵyn dárigerler qalypty dep otyr. Al, mektep oqýshysy Beknazar Meırambek óziniń batyldyǵy men qaısarlyǵyn kórsetip, jas búldirshinniń ómirin saqtap qaldy. Osy kózsiz erligi úshin ol Tótenshe jaǵdaılar departamentiniń arnaıy gramotamasymen jáne syılyqpen marapattaldy.
