Túrkistan oblysynda 11 basqarma qaıta qurylady
TÚRKІSTAN. QazAqparat - Túrkistan qalasynda ótken oblystyq máslıhattyń kezekti sessııasynda Túrkistan oblysynyń basqarý shemasyn bekitý týraly másele qaralyp, oblystaǵy basqarmalardy qaıta qurý týraly sheshim qabyldandy, dep habarlaıdy QazAqparat.
«Sheshimge sáıkes, Túrkistan oblysynyń ekonomıka jáne bıýdjettik josparlaý basqarmasy - oblystyq strategııa jáne ekonomıkalyq damý basqarmasy, Túrkistan oblysynyń qarjy basqarmasy - qarjy jáne memlekettik aktıvter basqarmasy bolyp qaıta quryldy. Al oblystyq ishki saıasat, din isteri, otbasy, balalar jáne jastar isteri jónindegi basqarmalar - Túrkistan oblysynyń qoǵamdyq damý basqarmasy bolyp biriktirildi. Budan ózge, oblystyq kásipkerlik, ındýstrıaldy-ınnovatsııalyq damý basqarmasy -kásipkerlik jáne saýda basqarmasy men ınvestıtsııa jáne eksport basqarmasy bolyp ekige bólindi», - delingen oblysy ákiminiń baspasóz qyzmeti taratqan habarlamada.
Sondaı-aq, oblystyq bilim basqarmasy - Túrkistan oblysynyń adamı áleýetti damytý basqarmasy, mádenıet jáne tilderdi damytý basqarmasy - oblystyq mádenıet basqarmasy, densaýlyq saqtaý basqarmasy - oblystyq qoǵamdyq densaýlyq basqarmasy, Túrkistan oblysynyń aqparattandyrý, memlekettik qyzmetter kórsetý jáne arhıvter basqarmasy - oblystyq tsıfrlandyrý, memlekettik qyzmetter kórsetý jáne arhıvter basqarmasy, týrızm jáne syrtqy baılanystar basqarmasy - týrızm basqarmasy bolyp qaıta quryldy.
Qalǵan 13 basqarma ózgerissiz qaldy. Jalpy sheshim boıynsha oblys ákimdiginde aldaǵy ýaqytta 23 basqarma jumys isteıtin bolady.
