Túrkistan oblysynda 100 jer ýchaskesi arnaıy qorǵa qaıtaryldy

TÚRKІSTAN. QazAqparat – Túrkistan qalasynyń prokýratýrasy qala aýmaǵynda jer zańnamasynyń saqtalýyna taldaý júrgizdi. Nátıjesinde 100 jer ýchaskesi arnaıy qorǵa qaıtaryldy, dep habarlaıdy QazAqparat tilshisi.

Oblystyq prokýratýranyń málimetinshe, qaıtarylǵan jerler ıgerýsiz jatqan nemese jaldaý merzimi aıaqtalǵan.

«Engizilgen prokýrorlyq qadaǵalaý aktisiniń negizinde arnaıy qorǵa kadastyrlyq quny 135 mln teńge bolatyn túrli sanattaǵy jer ýchaskeleri qaıtaryldy», - delingen prokýratýra málimetinde.

Eske salaıyq, buǵan deıin óńirdiń birqatar eldi meken turǵyndary jaıylym jersiz qalǵany týraly aıtyp, jergilikti bılik pen quzyrly organdardan kómek suraǵan bolatyn. Ótken jyldan beri 152 eldi mekende jaıylym máselesi ózekti ekeni anyqtalǵan. Jyl sońyna deıin sol eldi mekenderge 135 myń gektar jer qaıtarylyp, ákimdikterge bekitip berildi. Bul jumystar bıyl da jalǵasyn tabady.

«2021 jyly oblys boıynsha tek 25 aýyl okrýgi tolyq jaıylymmen qamtamasyz etilse, 2022 jyldyń basynan qazirgi tańda jaıylymmen qamtamasyz etilgen okrýgterdiń sany 70-ke jetip otyr. Jalpy oblysta 174 aýyl okrýgi bar. Bizdiń mejemiz 2025 jylǵa deıin osy eldi mekenderdi ortaq jaıylymmen qamtamasyz etý», - deıdi oblystyq Jer qatynastary basqarmasynyń basshysy Erǵalı Tilegen.