Túrkistan oblysynda 100 jastaǵy qarııa men 96 jastaǵy UOS ardageri ýchaskege kelip daýys berdi
Saıram aýdanynda eń belsendi daýys berýshiler tańsáriden saılaý ýchaskesine kelip óz tańdaýyn jasaýda. Solardyń biri Qarasý aýyldyq okrýgindegi N560 ýchaskesine alǵashqylardyń biri bolyp 100 jastaǵy Sadyq Qýatbekov aqsaqal nemerelerimen kelip, daýys berdi.
«Men elimniń bolashaǵyna beı-jaı qaraı almaımyn. Sondyqtan árbir saılaýdan qalmaı daýys berip kelemin. Prezıdentti tańdaý jarqyn bolashaqty tańdaý dep bilemin», - deıdi ol.
Aıta keteıik, Saıram aýdan boıynsha jalpy 86 ýchaskesi, 133 065 daýys berýshi bar. Barlyq ýchaske óz jumysyn ýaqytyly bastady. Saılaý boıynsha tańdaý jasaý keshki saǵat 20:00-ge deıin jalǵasady.
Sondaı-aq, 96 jastaǵy Uly Otan soǵysynyń ardageri Badan Tórebaev saılaý ýchaskesine kelip óz tańdaýyn jasady. Qarııanyń belsendiligi kópshilikti tántti etti. Al, daýys bergen soń, Alladan eldiń amandyǵyn tilep, bata berdi.
«El Prezıdentin saılaý arqyly biz eldiń bolashaǵyn tańdaımyz. Sondyqtan úıde jata almadym. Balalarǵa meni saılaý ýchaskesine alyp baryńdar dep tynyshtyq bermedim. Saılaýda árbir daýys mańyzdy. Sondyqtan barshańyzdy durys tańdaý jasaýǵa shaqyramyn. Elimizdiń mártebesi bıik bolsyn! Beıbit te berekeli ǵumyr kesheıik» – dedi aqsaqal.
Soǵys jyldary ardagerdiń Belarýs maıdanynda joryq joly bastalyp, aýyr shaıqasta erekshe erligimen kózge túsken. Sondaǵy janqııarlyǵy eskerilip, «Erligi úshin» medalimen marapattaldy. Joryq joly Berlınge deıin jalǵasty. І-shi dárejeli «Uly Otan Soǵysy» ordenimen, 2 ret «Erligi úshin», «Berlındi alǵany úshin», «Germanııany jeńgeni úshin» medaldarymen marapattaldy.
Elge 1950 jyly qarasha aıynda oralyp, eńbekke aralasty. Kentaý qalasyndaǵy «Myrǵalymsaı» kenishinde uzaq jyldar boıy jemisti jumys istep, zeınetkerlikke shyqty. Otbasynda 2 ul, 2 qyz tárbıelep ósirgen ardager 14 nemeresi, 2 shóbere súıip, beıbit kúnde baqytty ǵumyr keship otyr.
