Túrkistan oblysynda 100 oryndyq provızorlyq ortalyq ashylady
TÚRKІSTAN. QazAqparat - Túrkistan oblysy Ordabasy aýdandyq ortalyq aýrýhana janynan 100 adamǵa shaqtalǵan provızorlyq ortalyq ashylmaq. Bul týraly aýdan ákimi Nurbol Turashbekov halyqpen onlaın suhbat kezinde málimdedi, dep habarlaıdy QazAqparat tilshisi.
Aýdan ákiminiń sózinshe, qazir ortalyqty ashýǵa daıyndyq jumystary júrgizilip, aýdandyq aýrýhananyń burynǵy ǵımaraty jergilikti kásipkerlerdiń qoldaýymen tolyq jóndeýden ótýde.
Atalǵan nysan tamyz aıynda paıdalanýǵa berilmek. Ortalyqtyń jalpy aýmaǵy – 1500 sharshy metr. Sonymen qatar, aýdandaǵy Temirlan eldimekeninde «Arbat» aýmaǵyn abattandyrý jumystary qarqyndy júrgizilýde.
Merdiger mekeme aǵymdaǵy jyldyń sáýir aıynda bastalǵan qurylys jumystaryn jeltoqsan aıynda tolyq aıaqtamaq.
Aıta keterligi, bıyl aýdan ortalyǵy Temirlanda 600 oryndyq jańa mektep paıdalanýǵa beriledi dep josparlanyp otyr. 2018 jyly qurylys jumystary bastalǵan mektep bıyl jańa oqý jylyna oraı esigin ashady dep kútilýde.
Budan bólek aýdan ortalyǵyndaǵy ortalyq saıabaqta da qurylys jumystary aıaqtalyp, abattandyrylǵan.
Bıyl tolyq paıdalanýǵa berilgen saıabaqta Dańq memorıaly, aýdannyń qurmetti azamattarynyń alleıasy, botanıkalyq baq pen sporttyq alańshalar ornalasqan. Demalys ornynyń jalpy aýmaǵy - 5 gektar.
