Túrkistan oblysynda 10 mıllıon teńgeniń kıimin urlaǵan kúdikti ustaldy
TÚRKІSTAN. QazAqparat – Kúdikti qylmys ústinde qolǵa tústi. Ol izin jasyrý úshin dúkendegi beınebaqylaý kameralaryn óshirip otyrǵan, dep habarlaıdy QazAqparat tilshisi.
Saıram aýdandyq polıtsııa bólimine aryzdanǵan jergilikti turǵyn kıim-keshek dúkeninen taýarlarynyń urlanǵandyǵyn kórsetken. Jábirlenýshige keltirilgen shyǵyn kólemi shamamen 10 mıllıon teńgeni quraǵan. Atalǵan jaıtty polıtsııa qyzmetkerleri QR QK-niń 188-baby «Urlyq» boıynsha tirkeýge aldy.
«Jedel ýákilder shuǵyl izdestirý is-sharalary kezinde kúdiktiniń qaıta qylmys jasaýǵa kelýi múmkin ekenin alǵa tartyp, ony quryqtaýǵa arnaıy jospar qurdy. Nátıjesinde túngi ýaqytta saıramdyq saqshylar kúdiktini qylmys ústinde ustady. Ol qoıma ishinen kıim-keshekti zańsyz alyp shyǵyp, kóligimen áketip bara jatqan jolda qolǵa tústi» - delingen Túrkistan oblysy polıtsııa departamenti taratqan habarlamada.
Kúdikti jábirlenýshiniń júk tasýmen aınalysatyn jumysshysy bolyp shyqqan. Ol urlyq qylmysyn budan buryn da 3 ret jasapty. Birinshi ret jaryq sóngen ýaqytta beınebaqylaý kameralary isteımeıtinin paıdalanyp, 2 qap kıim-keshekti alyp ketken. Al qalǵan kezderi beınekamerany óshirip qoıyp, josparyn júzege asyryp júripti. Urlaǵan jańa kıimderdi Shymkentte 3 mıllıon teńgege satyp, aqshany óz qajettiligine jumsaǵan.
