Túrkistan oblysynda 10 qylmystyq iske qatysy bar kánigi ury ustaldy

ASTANA. QazAqparat – Túrkistan oblysynda 10 urlyq jaıtyna qatysy bar jas jigit ustaldy, dep habarlaıdy QazAqparat óńirdiń PD baspasóz qyzmetine silteme jasap.

Kentaý qalalyq polıtsııa basqarmasyna birneshe jergilikti turǵyn aryzdanǵan. Bir jábirlenýshiniń aıtýynsha, áldebireý kóshe boıynda ornalasqan dúkeniniń syrtqy esigin syndyryp kirip, sporttyq kıimder men balalar aıaq kıimin urlap ketken. Keltirilgen shyǵyn 370 000 teńgege jýyq. Kelesi turǵyn túngi ýaqytta dúkenine belgisiz bireýler kirip, kassada turǵan 400 000 teńgesin jymqyryp ketkenin jazady. Úshinshi turǵyn da osyndaı qylmystyń qurbany bolǵan. Onyń garajynan avtobólshekterin urlap ketken.

Jedel tergeý toby qurylyp, jınaqtalǵan aqparat nátıjesinde kúdiktiniń jeke-basy anyqtaldy. Ol óziniń turǵyn úıinen ustaldy. Buryn sotty bolǵany anyqtaldy. Sondaı-aq, saqshylar tekserý barysynda kúdiktiniń jalpy 10 urlyq jaıtyna qatysy baryn aıqyndady. Kúdikti qamaýǵa alynyp, QR QK-niń 188-baby (Urlyq) boıynsha sotqa deıingi tergeý amaldary júrgizilip jatyr.