Túrkistan oblysynda 10 densaýlyq saqtaý nysany salynady
NUR-SULTAN. QazAqparat – Túrkistan oblysynda 10 densaýlyq saqtaý nysany salynady. Bul týraly Úkimet otyrysynda QR Densaýlyq saqtaý mınıstri Alekseı Tsoı aıtty, dep habarlaıdy QazAqparat tilshisi.
«Túrkistan oblysyn damytýdyń keshendi jospary jobasynda 10 densaýlyq nysanyn, onyń ishinde Túrkistan qalasynda 7 jáne Arys pen Saryaǵash qalalarynda 3 nysan salý kózdelgen. YDA kompanııasy Túrkistan qalasynda memlekettik-jekeshelik áriptestik aıasynda 570 tósek-orynǵa arnalǵan oblystyq kóbeıindi aýrýhan qurylysy jobasyn iske asyrýǵa qyzyǵýshylyq tanytyp otyr. Memlekettik-jekemenshik áriptestiktiń bul jobasy respýblıkalyq deńgeıde júzege asyrylady jáne Túrkistan oblysynda 2021-2025 jyldary áleýmettik-ekonomıkalyq damytý keshendi josparyna qosylǵan. Oblys turǵyndarymen qonaqtaryna joǵary tehnologııalyq qyzmet kórsetetin halyqaralyq deńgeıdegi klınıka salynatyn bolady», - dedi ol.
Sonymen qatar ol 190 tósek-orynǵa arnalǵan oblystyq balalar aýrýhanasyn salý da josparlanyp otyrǵandyǵyn aıtty.
Jalpy, Túrkistan balalar aýrýhanasynyń ǵımaraty 2014 jyly salynǵan ári sanıtarlyq-gıgıenalyq normalarǵa saı keledi.
Biraq, quramynda hırýrgııalyq beıindegi mamandandyrylǵan bólimshesi, konsýltatsııalyq-dıagnostıkalyq emhanasy, dıagnostıka bólimshesi joq.
«Josparda Túrkistan qalasynda 500 kelýshige arnalǵan qalalyq emhana qurylysy da qarastyrylǵan. Qazirgi ýaqytta B.Sattarhanov shaǵyn aýdanynda alǵashqy medıtsınalyq-sanıtarlyq kómek kórsetetin nysan joq», - dedi Alekseı Tsoı.
