Túrkistan oblysynda 1 myń shaqyrym jol men 5 kópirge jóndeý júrgiziledi

Óńirde aýdan, qalalardy oblys ortalyǵymen jalǵaıtyn negizgi joldardyń jaǵdaıyna basa nazar aýdarylýda. Aımaqta jóndeletin 968 shaqyrym joldyń 435,6 shaqyrymy ótken jyly bastalǵan. Bıyl taǵy 532,4 shaqyrym jol men 5 kópirdiń qurylys-jóndeý jumystary bastalady. Oǵan qarjy qarastyrylǵan.

Oblystyń ońtústik baǵytyndaǵy Maqtaaral, Jetisaı, Shardara, Arys, Ordabasy aýdandarynda 81,1 shaqyrymdy quraıtyn 4 jolǵa - kúrdeli, uzyndyǵy 223,9 shaqyrymdyq 6 jolǵa ortasha jóndeý júrgizile bastady.

Shyǵys baǵyttaǵy Tólebı, Saıram, Túlkibas aýdandarynda 23 shaqyrymdy quraıtyn 3 jolda - qaıta qurý, 64,5 shaqyrymdyq 4 jolda - kúrdeli, 56,2 shaqyrymdyq 5 jolda ortasha jumystar qarqyndy júrýde.

Odan bólek, Keles, Saryaǵash, Qazyǵurt aýdandary aýmaǵynan ótetin 67,1 shaqyrymdyq 3 jolda - kúrdeli, 124,5 shaqyrymdyq 7 jolda ortasha jóndeý jumystary merziminen erte bastalyp otyr.

Al Túrkistan qalasyna jaqyn ornalasqan Báıdibek, Otyrar, Sozaq aýdandary men Kentaý qalasynda 92,2 shaqyrymdy quraıtyn 4 jolǵa kúrdeli, 234,8 shaqyrymdy quraıtyn 6 jolǵa ortasha jóndeý jasalady.

Aıta keterligi, 2019 jyldyń qorytyndysymen jalpy Túrkistan oblysy boıynsha 584,4 shaqyrymdy quraıtyn 24 jol jáne 5 kópirdi paıdalanýǵa berý josparlanǵan.

Aıta keteıik, oblystyq jolaýshylar kóligi jáne avtomobıl joldary basqarmasyna júktelgen aýqymdy jumys kólemin sapaly jáne merziminde oryndaý maqsatynda qurylys-montajdaý jumystarǵa jaýapty tehnıkalyq, avtorlyq qadaǵalaýshy jáne merdiger mekemelermen turaqty jınalystar ótkizilýde. Nysanda oryn alýy múmkin qıyndyqtar aldyn ala talqylanyp, sheshý maqsatynda jumystar atqarylýda. Ár nysanǵa bekitilgen jumys-óndiristik kestege sáıkes qurylys jumystary qatań baqylaýǵa qoıylyp, nysandardy aralaý-tekserý sharasy qolǵa alynǵan.