Túrkistan oblysynda 1 myń gektardan astam sýarmaly jer qaıtadan aınalymǵa endi

Bul týraly búgin Túrkistan oblystyq aýyl sharýashylyǵy basqarmasynyń basshysy Nurbek Badyraqov óńirlik kommýnıkatsııalar qyzmetinde ótken baspasóz jıynynda habarlady.

2018 jyly salada atqarylǵan jumystarǵa esep bere ketken óńirdiń bas agronomy sońǵy eki jylda jergilikti bıýdjetten 2,6 mlrd. teńge qarjy bólinip, 52 nysanǵa jóndeý jumystary júrgizilgenin málimdedi. Nátıjesinde, 45,5 myń gektar jer aǵyn sýmen qamtamasyz etilip 1 myń gektar jer jańadan aınalymǵa engen.

«Halyqaralyq qaıta qurý jáne damý bankiniń qarjylandyrýymen «Irrıgatsııa jáne drenaj júıelerin jetildirý» jobasynyń 3-shi kezeńinde 57,3 myń gektar jerdi qalpyna keltirý josparlanǵan. Respýblıkalyq menshikke ótkizilýi tıis 57,3 myń gektar sýarmaly jerdegi sý nysandarynyń 90% respýblıkalyq menshikke ótkizildi», - dedi N.Badyraqov.

Baspasóz ókilderimen kezdesýde saladaǵy ózge de ońdy ózgerister tilshiler nazaryna usynyldy. Máselen, aýyl sharýashylyǵynyń jalpy ónim kólemi 542,8 mlrd. teńgeni qurap, ótken jyldyń tıisti kezeńimen salystyrǵanda 60,4 mlrd. teńgege artyp, respýblıkada 2 kórsetkish bolyp otyr. Respýblıkada jalpy ónim kólemi boıynsha Túrkistan oblysynyń úlesi 12,4%-dy qurady. Aýyl sharýashylyǵy eksportynyń kólemi 180,9 mln. AQSh dollaryn qurap, ótken jylmen salystyrǵanda 12,6% nemese 20,2 mln. AQSh dollaryna artty.

Oblysta aýyl sharýashylyǵynyń negizgi kapıtalyna tartylǵan ınvestıtsııalar kólemi 43,8 mlrd. teńgege jetip, ótken jyldyń sáıkes kezeńimen salystyrǵanda 111,4% qurady. Respýblıka boıynsha tartylǵan ınvestıtsııa kólemi boıynsha Túrkistan oblysy 4 orynda.

Bas agronom byltyr 181,3 gektar aýmaqqa jylyjaı salynyp, onyń oblysymyzdaǵy kólemi 1344 gektar bolǵanyn (2017 jyly 1162 gektar) da baıan etti.

«Osylaısha, jylyjaı isin órkendetý boıynsha Túrkistan oblysy respýblıkamyzda 77 paıyzdyq úleske jetti. Bıyl, 2019 jyly da aımaqta 180 gektar jylyjaı salý josparlanyp otyr»-dep jazady Túrkistan oblysy ákimdiginiń baspasóz qyzmeti.