Túrkistan oblysynda 1 mln ga jaıylymdyq jer memleketke qaıtarylady
Oblystyq jer qatynastary basqarmasynyń basshysy Erǵalı Tilegenniń aıtýynsha, 2022 jyly eldi mekenderdegi ortaq jaıylym kólemin 1012,0 myń gektarǵa ulǵaıtý jospary ázirlenip, eldi mekenderdi ortaq jaıylymmen qamtamasyz etý boıynsha ár aıǵa jospar kestesi bekitilgen.
Búgingi kúni bul jumystar eki baǵytta júzege asyrylýda. Birinshi baǵyt boıynsha maqsatyna saı paıdalanylmaǵan 405,2 myń gektar jaıylymdyq jerdi memleket menshigine qaıtarý kózdelse, ekinshi baǵyt boıynsha iri jer paıdalanýshylarmen memorandým arqyly 606,8 myń gektar jerdi qaıtarý josparlanǵan. Al búginde 58,5 myń gektar jer memleket menshigine qaıtarylsa, memorandým arqyly 267 myń gektar jaıylym elge berildi.
Sonymen qatar 2021 jyly qurylǵan jumysshy top tarapynan aýdan, qala ákimdikteri boıynsha jaıylym jer ýchaskelerine zerdeleý jumystary júrgizilgen. Nátıjesinde 476,2 myń gektar jer maqsatyna saı paıdalanylmaǵany anyqtalyp, habarlama berilgen.
Túrkistan oblysynyń ákimi Ómirzaq Shókeev jaıylym jerdi elge qaıtarý jumysy jalǵasatynyn jetkizdi.
«Jaıylym qoryn molaıtý – óte mańyzdy ári jaýapty másele. Aýdan ákimderi jaýapty basqarmalarmen birlesip jumysty jalǵastyrýy tıis. Bizdiń meje – bir mıllıon gektar jaıylymdy qaıtarý. Qazirdiń ózinde 30 paıyzy qaıtarylyp úlgerdi. Memorandým arqyly jaqsy jumys atqarylyp jatyr. Jerdiń ıeleri jaıylymǵa muqtaj jandar ózderiniń aýyldastary ekenin túsinýi tıis. Igerilmeı jatqan jerdi eshkim bos qaldyryp qoıa salmaıdy. Ár aı saıyn osy másele apparat otyrysynda kún tártibine engizilip tursyn. Jaıylym máselesi tikeleı qadaǵalaýda bolady», – dedi Ómirzaq Shókeev.
