Túrkistan oblysynda 1,5 jylǵa jetetin mal azyǵy qoryn jasaqtaýǵa múmkindik bar

TÚRKІSTAN. QazAqparat – Túrkistan oblysynda mal azyqtyq shópter bıyl sharýalarǵa qoljetimdi baǵada satylyp jatyr. Egistik alqap basynan tabıǵı shópterdiń presin 350-400 teńgeden, al jońyshqany 600-700 teńgeden alýǵa bolady, - dep habarlaıdy QazAqparat tilshisi.

Túrkistan oblystyq aýyl sharýashylyǵy basqarmasynyń basshysy T.Ospanovtyń aıtýynsha, bıyl aýa raıynyń jaýyn-shashyndy bolýyna baılanysty aımaqty 1,5 jylǵa jetetin mal azyǵy qorymen qamtamasyz etýge múmkindik bar.

Búgingi kúnge mal basyna qajetti 4,1 mln. tonna jem-shóp 100% jınalǵan. Atap aıtsaq, 289,9 myń tonna saban, 109 tonna pishendeme (senaj), 1,8 mln. tonna tabıǵı shóp, 1,8 mln. tonna jońyshqa, 6,5 myń tonna súrlem jınalyp úlgergen. Oǵan qosymsha oblys ákiminiń tapsyrmasyna sáıkes aýdan, qala ákimdikterine 1 mln. tonna azyqtyq qordy qalyptastyrý jospary usynylǵan. Jalpy qystatý naýqanyna deıin óńirde 5,1 mln. tonna mal azyǵy jınalatyn bolady.

Aıta keteıik, oblystaǵy mal basyna qajetti azyqtyq jem kólemi 784,9 myń tonnany quraıdy. Onyń 82% (644,8 myń tonna) oblysta óndirilgen daqyldar esebinen qamtamasyz etiledi. Budan bólek, «Azyq-túlik kelisimshart korporatsııasy» AQ-y arqyly oblysqa bólingen 34,4 myń tonna bıdaıdan alynatyn 9,3 myń tonna kebek agroqurylymdarǵa arzandatylǵan baǵamen satylyp jatyr.