Túrkistan oblysynan soltústik óńirlerge 6 myńnan astam adam qonys aýdarǵan
Búginge deıin soltústik aımaqtarǵa kóshken otbasynyń árbir múshesine 102 myń teńge berilse, endi eki eselenip 204 myń teńge tólenetin boldy. Turǵyn úımen, jumyspen qamtamasyz etý óz aldyna bólek júredi. Degenmen kóshtiń údere júrýine kedergi keltiretin problema da kóp. Búgin sol túıitkilderdi «Nur Otan» partııasy Túrkistan oblystyq fılıalynyń uıymdastyrýymen keń kólemde talqylandy. Onlaın formatta ótken jıynǵa Soltústik Qazaqstan, Shyǵys Qazaqstan, Pavlodar, Qostanaı oblystaryndaǵy Jumyspen qamtýdy úılestirý jáne áleýmettik baǵdarlamalar basqarmasynyń basshylary men óńirdegi jumyspen qamtý ortalyqtarynyń mamandary qatysty.
«Alǵashqy kezekte «Eńbek» baǵdarlamasynyń eldi-mekenderde nasıhaty kem. Onyń ústine karantın de sebep bolyp, ótken jyly nebári 347 otbasy ǵana kóshipti. Al, 2019 jyly 560 otbay qonys aýdarǵan edi. Endi osy mejeden asyrý basty jospar bolyp otyr. Jalpy atalǵan 4 oblysqa bıyl 6039 adamdy qabyldaý mindeti qoıyldy. Sonyń ishinde Soltústik Qazaqstan oblysy 2347 adamdy qarsy alýǵa qyzý daıyndalýda. Basqarma basshysynyń orynbasary Rınat Sergeıuly olar úshin arnaıy úıler turǵyzylyp jatqandyǵyn aıtty. Alaıda Pavlodardan ózge eki óńirde qonys aýdarýshylar úshin jańa baspanalar soǵylyp jatqan joq. Negizinen bosap qalǵan úıge ornalastyrady. Sonymen birge óńirler arasynda ortaq aqparattyq baza qalyptaspaǵan. Qaı aımaqta qandaı jumys oryndary bar, baspana baǵasy, sharýashylyq jaıy tb málimetterdi árkim ózinshe izdep, áýrege túsýde. Tolyq málimet almaǵandyqtan kópshiliktiń kókeıinde kúmán qalyp, tolyq sene bermeıdi»,- deıdi «Nur Otan» partııasy Túrkistan oblystyq fılıaly tóraǵasynyń orynbasary Beısen Tájibaev.
Jıynda sonymen qatar kóship barǵanedarǵa janashyrlyq jetispeıtini aıtyldy. Bul elimizde kóshi-qon salasymen aınalysatyn atqarýshy júıege tán kemshilik deıdi mamandar.
«Máselen, aqparat surap kelgen turǵyndarǵa jumyspen qamtý ortalyǵynyń mamandary tııanaqty túsindirmeıdi. Nemese kelesi mamanǵa silteı salady. Qysqasy sandaltady. Onsyz da qysylyp, jáýteńdep júrgen turǵyn budan soń tipten kóńili qalady, senbeıdi, kóshpeıdi. Іsker, elshil fermer- kásipkerler aýadaı qajet. Ázirge oblysta Jańabaı Aǵabekov syndy azamattar az bolyp tur. Bul kásipkerdiń qoldaýymen sáýir aıynyń sońynda 3 avtobýs soltústik oblystardy aralap qaıtýshylardy tegin aparyp, alyp qaıtady. Keıin naqty sheshim qabyldaǵanda otbasymen birge, bıýdjetten bólingen qarjynyń kómegimen kóshe beredi. Menimshe osyndaı kásipkerler sol óńirlerden jer telimderin alyp, ońtústikten jumys kúshin tartqanda ǵana baǵdarlama ómirsheń bola túsedi»,- deıdi mamandar.
Jıynda osy syndy máselelerdi keńinen talqylaǵandar ortaq sheshimge keldi. Sóıtip barlyq aýdanda baǵdarlamaǵa jaýapty jeke maman bekitilip, ortaq ınternettik aqparattyq baza qalyptasatyn boldy. Tórt oblystyń ókilderi taıaýda Túrkistan oblysyn keńinen aralaý úshin delegatsııa tobyn attandyrmaq. Zańdaǵy kemshin tustardy tolyqtyrý úshin arnaıy usynymdar ázirlenedi. Ony Parlament Májilisindegi depýtattarǵa joldap, jaýapty mınıstrlikpen birge talqylaýlar uıymdastyrýǵa atsalysatyn bolyp sheshildi.
